Hugot nang ipatuman sa Cebu City ang no vaccine, no entry policy sa tanang mga establisamento dinhi sa siyudad.
Samtang dunay naglantaw niini nga dili makatarunganon para sa mga tawong wala pa makapabakuna ug sa mga wala gyuy planong magpabakuna tungod sa personal nga mga rason, para gyud kini sa proteksyon sa tanan.
Angay sab hunahunaon nga dili sab kini makatarunganon para sa mga nagpabakuna tungod kay kun modaghan ang mga kaso tungod sa mga tawong walay bakuna nga nangatakdan unya malandig sila sa tambalanan mabutang man sab sa peligro ang health care system.
Kun modaghan ang nalandig sa tambalanan, mag-estrikto na sab ang gobiyerno, hasta ang mga nagpabakuna nga kasagaran maoy nanginabuhi para sa ilang pamilya mangapagan sa restriksyon.
Samot na kadtong mga walay bakuna unya nanginabuhi sab, siguro gyud nga maapektahan tungod aning polisiya, apan naa may hulga sa panglawas sa tanan ug subay sa balaod ang kaayohan sa kadaghanan man maoy matuman.
Kaning pag-estrikto nga pag-limit sa lihok sa mga dili bakunado , proteksyon kini para nila ug para sa mga bakunado.
Lisud kaayo kun magsige nalang og saka-kanaog ang mga kaso unya magsige og balik-balik ang mga restriksyon tungod kay dili na makahuygo sa pagpanarbaho ang mga tawo.
Katungod sa uban nga dili magpabakuna apan wala kini magpasabot nga hasta ang katungod sa mga nagpabakuna para manginabuhi maapektahan.
Di mahimong maputol ang katungod sa uban para lang sa katungod sa adtong dili motuman sa kung unsay gisunod sa kinabag-an. Tungod kay matag mosaka ang mga kaso, pagan man ang tanan.