Labihang paspasa sa sulbong sa mga kaso sa COVID-19 sa Cebu City nga ang bag-ong mga kaso sa usa sa iyang mga barangay mas daghan pa kay sa tibuok Probinsiya sa Bohol niadtong Huwebes, Enero 20: Ang Guadalupe, Cebu City dunay 85 ka bag-ong kaso samtang ang Bohol dunay 75.
Wa ra katunga sa Guadalupe ang kaulohan sa Bohol, Tagbilaran City, nga nirehistro og 31 ka bag-ong kaso sa samang adlaw. Sama sa nahitabo sa niaging duha na ka tuig, ang Cebu City na say epicenter sa pandemya sa rehiyon.
* * *
Gawas sa Guadalupe, niang dugang 13 ka barangay sa Cebu City nga nakatampo sa kinadaghanang bag-ong kaso niadtong Huwebes: Tisa, 59; Lahug, 53; Camputhaw, 52; Capitol Site, 51; Talamban, 47; Apas, 35; Punta Princesa, 34; Kalunasan, 30; Mambaling, 30; Sambag II, 29; Banilad, 25; Basak San Nicolas, 25; ug Inayawan, 25.
Kasagaran sa kinadaghanan og bag-ong mga kaso, nga gidudahang tungod na sa mas mananakod nga Omicron, mao ang mga barangay nga kinadak-an og populasyon, nahimutangan sa labing dagkong mga pabrika ug mga kompaniya ug sentro sa ekonomikanhon nga kalihokan.
* * *
Wa papiri ang mga barangay sa mga silingang Mandaue City ug Lapu-Lapu City. Nag-double digit ang bag-ong mga kaso niadtong Huwebes sa mosunod nga mga barangay sa Mandaue: Cabancalan, 17; Subangdaku, 17; Canduman, 16; Paknaan, 16; Jagobiao, 15; Tabok, 15; Tipolo, 12; ug Banilad, 10.
Nag-double digit sab ang bag-ong mga kaso sa mosunod nga mga barangay sa Lapu-Lapu: Basak, 25; Babag, 24; Bankal, 20; Calawisan, 15; Looc, 14; Mactan, 14; Pajac, 14; Gun-ob, 12; Agus, 10; ug Pusok, 15.
* * *
Sama sa naandan, ang Cebu Province ang ikaduhang kinadaghanan og bag-ong mga kaso sa tibuok Central Visayas. Kinadaghanan ang Talisay City, 116; Naga City, 61; Minglanilla, 55; Consolacion, 54; Liloan, 42; Carcar City, 32; Toledo City; Argao, 14; Cordova, 13; Dalaguete, 11; Sibonga, 10 ug Tuburan, 10.
Nalabwan ang Bohol sa Negros Oriental nga dunay 94 ka bag-ong mga kaso niadtong Huwebes, gipangunahan sa Dumaguete City nga dunay 38. Ang maayong balita mao nga, ug hinaot padayong makalingkawas sa morang kuwitis nga pagkatay sa Omicron, way bag-ong kaso sa Covid-19 ang Siquijor.
* * *