Nia na sa Sugbu ang Omicron variant base sa migawas nga resulta sa genomic sequencing sa mga samples sa mga pasyenteng napositibo sa Covid-19 sumala pa sa Department of Health-7.
Daan ng dunay pagduda nga ang maong variant sa Covid-19 naabot na dinhi tungod sa paspas nga pagsaka sa mga kaso pagsulod lang ning buwan sa Enero.
Ang resulta gikan sa 78 ka mga sampol nga gikolekta gikan pa niadtong Disyembre 27,2021 hangtud Enero 6,2022. Kung subayon, sa maong mga adlaw dili pa kaayo daghan ang mga kaso.
Apan sa pagdagan sa mga adlaw sa bulan sa Enero nabantayan ang pagdoble sa mga napositibo ug nisaka ang positivity rates matag adlaw ug gilabwan pa ang gikonsiderar sa World Health Organization nga safe nga 5 percent.
Nagpasabot kini nga kadtong mga napositibo anang mga petsaha sa Disyembre hangtud Enero 6 posibleng nakapanakod na sab sa uban nilang gikauban nga wala ra mahibaw-i ug mao sab ang posibleng nagsige og panakod maong niburot og maayo ang mga kaso.
Ang maong variant dili hinuon sama sa kakuyaw sa ubang variants sa Covid-19 sama sa Delta variant tungod kay giingong mild symptoms ra ang dala niini. Apan gibawi niini kini sa kadali nga makatakod.
Bisan tuod dili grabe ang sintomas mahimo gihapon niining mabutang sa peligro ang health care systems sa nagkadaiyang lugar kun ang matakdan niini mga masakiton, senior citizens nga hinay na og resistensiya ug walay bakuna kay siguro man gyud silang madala sa tambalanan.
Kung dili gyud mopatuo ang mga tawo pagsunod sa basic health protocols ug magmagahi gihapon sa pagpabakuna ug makaingon sa pagsaka pa gyud sa mga kaso, posibleng mapagan ang tanan kun mag- lockdowns.
Dili man tuod gusto sa gobiyerno nga magpatuman og lockdowns kay daghan ang maapektahan niini, apan kun mabutang gani ang peligro ang kinabag-an, usa kini sa ilang pamaagi aron makontrol ang pagkuyanap sa Covid-19.
Pagkakaron, gusto sa gobiyerno limitahan ang paggawas-gawas sa mga dili bakunado tungod kay sila maoy naa sa peligro. Samtang dili kini ikalipay sa mga hingtungdan apan mao lang kini usa sa pamaagi aron malikay sila sa maong sakit.