_banat
^

Banat Opinyon

EDITORYAL - Pinalahi nga Pista Senyor

Banat
EDITORYAL - Pinalahi nga Pista Senyor

Pinalahi ang kapistahan sa Balaang Bata karon dinhi sa Sugbu. Wala na ang sama pagdugok sa mga bisita, langyaw man o mga taga laing probinsya nga moanhi gyud aron mosaksi sa kasadya Pista Senyor ug ang kulturahanong kalingawan ang Sinulog Festival.

Kining tanan tungod sa hulga sa coronavirus (COVID-19) nga gipiangan dili lang ang Sugbu kondili ang tibuok kalibotan sugod pa sa miaging tuig 2020.

Hulga nga dili mahimong ipadaplin lang sa mga gobiyerno tungod kay makamatay kini ug labaw sa tanan nakapakamang og mga ekonomiya, way pili gamhanan man o dili nga mga nasud.

Kaniadto manganhi gyud ang mga deboto aron pagtuman sa ilang mga panaad ngadto sa Balaang Bata. Ang uban manganhi aron mangaliya ug mangayo og pabor sa Senyor para sa ilang kaugalingong kalamboan, sa pamilya, sa trabaho ug uban pa.

Gawas sa relihiyosong katuyoan nituyo og anhi sa Sugbu ang uban aron lang makasuway kun unsa kasadya ang Sinulog ug dunay uban aron magnegosyo.

Makamingaw sab ang pagsaba-saba sa musika ug banda sa mga nagkadaiyang mga balay patigayon, balay kalingawan, mga resorts bisan sa mga hilit nga kalungsoran sa isla sa Sugbu nabulahan sab sa kapistahan.

Ang turismo nga dala sa Pista sa Senyor ug sa Sinulog sa tibuok isla sa Sugbu naapektahan gyud sa pandemiya. Dugangan pa nga nahitabo ang bagyong Odette, naselyohan gyud karong tuiga ang pagkawagtang sa mga naandang kalingawan.

Hinuon kun debosyon maoy tuyo, makasabot ra sab tingali ang Balaan Bata nga dili gyud makapanagkot diha sa Basilica Minore del Sto. Niño ang deboto basta matinud-anon lang ang deboto ug kinasing-kasing ang debosyon.

Apan bisan wala kining mga kalingawan ug mga dagkong relihiyosong kalihokan nakadaginot man sab ang tanan ilabi na ang mga local government unit partikular ang Cebu City.

Nakadaginot kini tungod kay walay pila ka toneladang basura nga hipuson human sa tanang kalihokan sa Sinulog, nakadaginot sa enerhiya ug magamit hinuon ang pundo sa padayong recovery gikan sa bagyo ug sa pandemiya.

Ang importante lang nga bisan wala ang tanang mga kalingawan, gipakita sa mga Sugbuanon ug sa tanang mga deboto sa kalibotan ang ilang tiunay nga debosyon bisan wala sila dinhi karon atol sa kapistahan.

SUGBU
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with