Matud pa ni Secretary Duque, mahimong mopasar og ordinansa ang mga lokal nga kagamhanan alang sa mandatory vaccination, pinasikad kuno sa Local Government Autonomy Act of 1992 ug kon ugaling mouyon usab ang katawhan. Nagkalandrakas hinuon ang resulta ni’ng pagsawsaw ni Duque sa hisgutanan nga DILG ang angayan mokomento. Una, walay balaod nga Local Government Autonomy Act of 1992. Ikaduha, kon uyon ang katawhan, dili na kinahanglan ang ordinansa. Ginaingon nga “ang tawo nga nagpatuo nga nasayod siya sa tanan naghatag lang og konsumisyon ngadto sa tawo nga tinuod nga nasayod sa tanan”. Ni’ng kahimtanga, nahisama si Secretary Duque sa dagtom nga panganod nga kon mahanaw na, mahimong hayag ug maanindot ang atong adlaw. Baya no!
Sama sa kuneho
Gipasabot ni DILG Secretary Año nga dili nila intensyon nga putlon ang subsidiya’ng 4Ps ni’ng ilang pagpalutaw sa ideya nga “No vaccine, No ayuda” policy. Tuyo lang kuno nila pagdasig sa katawhan nga magpabakuna. Gisuportahan usab sa DOH ang maong sugyot. Sama sa polisiya nga “carrot and stick, maanindot ang sugyot sa DILG kay naghatag og ganti sa mga motuman niini ug maaghat sa pagpabakuna. Apan adunay nagpahipi nga kakuyaw luyo sa “carrot and stick policy.” Kay ginaingon baya nga “kon trataron mo ang katawhan nga sama sa asno, hayan molihok usab sila sama sa asno.” Madahaan!
Dakopon kon motabang
Mipahimangno ang Bangko Sentral ng Pilipinas (BSP) nga peke ang P500 bill nga adunay larawan ni kanhi Presidente Ferdinand Marcos. Gidasig sa BSP ang katawhan sa pagtaho sa ilang buhatan kon adunay kasayuran sa pagpakatap sa peke nga kwarta. Dili pagasabton nga kay naglisod sa kwarta ug dako na’g utang ang gobyerno, mahimo na ni bisan kinsa nga motabang pagbuhat og kwarta, kay krimen ang maong buhat. Gumikan niini, nakatuaw ang akong higala’ng Muslim nga, “Makalibog ang gobyerno. Ingon nga wala na’y kwarta. Ato tabangan himo og kwarta, dakopon man hinoon ‘ta”. Pagkatoytoy!
Walay habas mogasto
Kon si Presidente Duterte ang pasultihon, angayan prisohon ang mga opisyal sa Pharmally ug nga dili niya kini igsapayan, kon wala gayod sila makabayad sa ilang bulohisan. N’ng kalibutana, walay hingpit nga segurado gawas sa kamatayon ug sa buhis. Busa makita nato ang katawhan nga magdaginot gayod sa paggasto aron makabayad sa ilang buhis ngadto sa gobyerno kinsa walay habas nga mogasto sa maong buhis, lakip na ang pagsweldo sa mga tawo’ng tapolan diha sa kagamhanan. May’pag moligeed!
Ayaw pailad sa halok
Miingon si Pasig City Mayor Vico Sotto nga unya na siya mosanong sa hangyo nga mohalok kaniya ang iyang mga konstituwenti human na gayod sa pandemiya. Aron mosanong ang mayor nga mahagkan, mahimong moingon ang iyang konstituwenti nga “Pahulama ko’g halok Mayor bi, i-uli ra bitaw.” Apan ni’ng panahon sa eleksyon, angayan tamdan sa mga konstituwenti ang panultihon nga, “Ayaw pahalok sa mangingilad, ug away usab pailad sa halok.” Saoonz!