Samtang nagbaktas sa Colon paingon sa opisina, nahinumdom ko sa kinahanglan nakong paliton sud sa usa ka tindahan.
Sa ganghaan sa usa ka dakong tindahan abtik nga gibantayan sa gwardiya ang tanang tawo nga mosulod pinaagi sa pagsusi sa ilang temperatura ug kun duna bay mask ug face shield.
Sa akong pagtikang aron unta mosud sa tindahan gibabagan ko sa gwardiya, nakalimot diay ko pagsul-ob og face shield.
Tungod lagi kay tanan sa mga nisud igo rang gibutang sa agtang ang face shield ug wala gyuy kapuslanan, akong gihangyo ang gwardiya dili ba mahimo mosulod kadali kay duna lang koy kinahanglan paliton.
Matud sa gwardiya di gyud mahimo tungod kay kinahanglan sad kong magbutang og face shield sa agtang.
Wala na ko makiglalis sa gwardiya tungod kay sayod ko’ng igo lang sab siyang nagtuman sa sugo. Napugos ko og kuot og P20 sa akong bulsa aron pagpalit og face shield gikan sa tindira kilid sa ganghaan sa tindahan ug gipakita sa gwardiya aron makasud.
Wala na gani ipasul-ob sa gwardiya, igo lang niyang gitan-aw dungan ang sinyas nga pwede nakong mosulod.
Sulod sa tindahan way bisan usa nga nagsul-ob sa face shield busa tataw nga wa ni kapuslanan ug naghatag lang og dugang bago sa publiko.
Klarong gihimong negosyo sa mga mapahimuslanong mga opisyal sa gobyerno pinaagi sa paghimo niini nga kabahin sa protocol batok sa COVID-19.
Dihang miluwat og pamahayag si Acting Cebu City Mayor Michael Rama nga uyon siyang wagtangon na ang face shield isip kabahin sa protocol sigurado kong daghan ang nalipay gawas lang sa mga negosyante niini.
Mismo si Rama nakabantay nga wa gyuy kapuslanan ang face shield. Apan samtang kumbinsido siya nga hinanggaw ang maong lagda, gitugyan niya ang disisyon ngadto sa mga negosyante padayonon ba o dili pagrequire ang face shield sa mga buot mosulod sa mga balay patigayon.
Taphaw ang pamahayag ni Rama ug klarong namolitika. Isip acting mayor, siya maoy dunay gahom pagdisidir ipadayon pa ba o dili ang maong lagda.
Igo rang nagsunod ang mga magpapatigayon sa lagda nga gipatuman sa gobyerno. Kun moingon ang dakbayan nga wala na kinahanglana ang face shield way mahimo ang mga tindahan gawas sa pagtuman niini.
Busa kun tinuod ang iyang simpatiya sa publiko angayang mohimo og klaro ug hugot nga baruganan si Rama ug dili kay magpalingpaling.
Niining panahon sa krisis, gikinahanglan sa katawhan ang lider nga dunay baruganan ug dili salingkapaw.