BBM-Sara na ba?

Makalingaw ang dula sa politika nga giapilan nila ni Davao City Mayor Inday Sara Duterte-Carpio ug kanhi Senador Bongbong Marcos (BBM). Morag chess game.

Kada move atong gibantayan. Usab, mora ta’g nagsunod og teleserye sa usa ka kulba-hinam kaayong salida.

Mga utok nakutaw:  Unsa ba? Wala na gyoy BBM-Sara tandem? Or, may purohan pa?

Niadtong Oktubre 23 man god, nag-abot si BBM ug Inday sa siyudad sa Sugbo. Unya, didto sa lawak sa hotel nga giestaran ni Inday, adunay closed door meeting nilang duha ni BBM. Hinuon, diha pod si Senador Imee Marcos ug laing suod nila. Miabot duha ka oras ug tunga ang maong panagtagbo. Pero, walay mihungaw unsay ilang giistoryahan?

Laing talan-awong nagdala’g tanghaga: Ang pag-isa nila ni BBM ug Inday sa mga kamot ni Cebu Governor Gwen Garcia, kinsa ilang giendorso alang sa paglansar niini pag-usab isip gobernador sa Sugbo sunod tuig. Senyales ba kini, nga may chance pang modagan si Inday og mas taas puwesto sa gobiyerno ug makig-tandem ni BBM?

Apan giklaro ni Inday nga dili siya molansar pagka-presidente. Pero, iyang suportahan si BBM sa pagkandidato niini pagka presidente sa Pilipinas sa 2022 national election.

Molansar-balhin kaha si Inday og kandidatura? Imbes, mag-mayor, mag-bise presidente na lang ug makig-uban ni BBM?

Samot na, dihang nagsul-ob si Inday og bestidang pink, diin sa akong pangagpas, atbangan niya si Leni Robredo pinaagi sa paglansar pagka bise-Presidente aron matabangag maayo si BBM nga maoy modaog pagka-presidente batok ni Leni.

Ug sa kataposan, ang sign language sa mga kamot ni BBM ug Inday: ang V-sign ug punch-sign diha sa ilang panagtupad-barog.

Pun-an pa, nga sa Cebu City sila nagtagbo – ang tungatungang bahin sa Visayas nga nagbulag sa Luzon ug Mindanao.

Wala ba kini maghatag og simbolo-mensahe nga hiusahon ilang puwersa aron matapok-tipon ang solidong botos sa tanang DDS ug BBM supporters from north to south ug maangkon ang land slide nilang kadaogan? Posible baya!

Actions speak louder than words. Ug base sa gipakitang mga lihok nila ni BBM ug Inday, daw nag-anunsiyo kini, nga madayon gyod ang ilang tandem. Hinuon, kaugalingon ko ra kining interpretasiyon.

Sa Nobiyembre 15 pa nato masayran ang tinuod mahitabo.