Kisdom ang langit ug nahimong wala makapahuway ang mga bawod nga padayong nidasamag sa walay mahimong lapyahan luyo sa kumbento. Ang maong mga bawod nagpungasi ug sa maong pagpungasi nihinay hinay usab og bundak ang ulan.
Gikan sa ginagmay nga lusok ngadto na sa dinagko. Hangtud nga nahimong daw sa dinaguok ang tingog niini. Malisod ang paggawas gawas rong mga panahona. Mas maayo pa nga magpundo sa kwarto uban ang pagbasabasa sa mga libro.
Nahinumdom nuon ko sa sugilanon sa lunop diha sa balaang kasulatan. Lalim ka ana nga kap-atan ka mga adlaw ug gabii padayong niulan ug maoy hinungdan kun nganong nisaka ang tubig nga maoy hinungdan sa pagbanlas sa daghang mga tawo. Bugtong ang pamilya lamang ni Noe ang nahabilin. Human sa maong katalagman, nibathay sa panganod ang bangaw timaan sa paglurang sa maong katalagman ug ang paghulip niini sa kalinaw nga dili mahimong mahatag sa kalibutan.
Ning panahon sa pandemiya ug kalisdanan, daghanan tingali nato ang buot nga magpauwan na lamang. Pinaagi ning maong pagpauwan nahimong di makit-an sa kadaghanan ang atong pagbangotan. Matabonan sa uwan ang luha nga niagas gikan sa atong mga mata. Ang nahitabo sa atong palibot nga walay igong kapaingnan gumikan sa nagpadayong pagkatun-as sa atong mga baruganan maoy nibanlod kanato sa kawalay tino nga padulngan.
Ang atong gihimo nga magpaulan na lamang usa man ka pagtago sa tinud-anay nato nga gibati. Buot kitang mogawas nga isog ug malaumon bisan pa man kun sa tinud-anay lang nahimong nikurog na ang atong mga tuhod. Defense mechanism ang ilang tawag ana. Ug mao kana ang gibuhat sa kadaghanan kanato karon.
Ang bisan unsang sudlanan mapuno gyud ug moawas labina kun padayon kining masudlan. Sama sa atong mga kasubaan padayon silang mosugwak ug mobaha labina kun nahimong barado ang naandang agianan sa tubig.
Ang hinungdan kahakog ug kawalay igong kahamtong sa mga tawo nga padayong niabuso sa kalikupan. Ang mga kahoy nga giputol ang dili na makapugong sa yuta nga modahili ug mahimong mokalas sa mga kinabuhi. Ang patuyang nga paglabay sa mga basura sa atong katubigan maoy nibara sa mga naandang agianan niini.
Ang pagtukod sa mga subdivisions sa mga dapit nga delikado mao man ang nibanlas kanato. Ug labina gyud ang mga walay tinguha nga moalagad apan nagpapili sa katawhan mao man ang nihimo sa atong katilingban nga mas nisamot pa hinuon sa iyang kahimtang.
Duna kitay mahimo niini ug kini ang paggamit sa ulan ingon nga sanglitanan nga kun ang ginagmay nga lusok magkauyon mas sayon kaayo diay ang paglumpag sa gambalay nga dili makiangayon.