Daghan na kaayong mga bakuna ang nangabot nganhi sa atong nasud, ug daghan pa ang gipaabot nga moabot. So, kadtong nagdumili pa pagpabakuna, wala na gayud silay igong hinungdan ngano na naglikay pa sila sa mga vaccines.
Of course, ang ilang gikahadlokan, whatever they are, walay mga scientific evidence, ilabina ang ilang gikahalokan nga tingali unya’g ma-zombie sila. Pastilan.
Sa unang adlaw sa Oktubre lamang, nangabot ang dugang 2.5 million doses nga procured Sinovac vaccines, ug 883,350 doses of Pfizer-BioNTech vaccines nga gi-donate sa America pinaagi sa COVAX facility. Ug si Heather Variava, U.S. Embassy chargé d’affaires, mibutyag nga dugang Pfizer doses ang i-deliver nganhi sa atong nasud.
Sa mosunod nga mga adlaw, gipaabot nga dugang 5.5 million doses ang mangabot nganhi sa atong nasud, initially alang sa Manila, Cebu ug Davao, nagkanayon si Variaya.
Ug si Rabindra Abeyasinghe, country representative sa World Health Organization (WHO) mihatag og assurance nga magpadayon nga makadawat ang Pilipinas ug ma-steady supply sa vaccines gikan sa COVAX facility.
Mao nga ang chief implementor sa National Task Force against COVID-19, Vaccine Czar Carlito Galvez, Jr, nanawagan sa mga lokal nga pangamhanan paghingusog sa ilang vaccination program.
Giawhag ni Galvez ang mga LGUs pag-acquire og ultra-cold storage facilities alang ning maong mga temperature-sensitive nga mga vaccines.
Ni Galvez pa: “Magpabakuna na tayo kasi talagang napaka-epektibo against sa Delta variant. Kung kayo ay nagnanais magpabakuna, magparehistro na po at nakikita natin na very safe po ang vaccines.”
Kon dili mo motuo ni Galvez ug sa mga eksperto sa panglawas, na luwas ang mga vaccines, kinsa may inyong tuhoan?
Kon dili ka magpabakuna, ania ang pahimangno sa spokesperson sa DOH, Undersecretary Maria Rosario Vergeire: “If they remain unvaccinated, they won’t get the needed additional protection against severe COVID-19.
This will lead to hospitalizations and overwhelm our health system, and consequently, lifting of restrictions will be delayed. “
Sa record sa DOH, as of September 21, 12 lamang ka nasud sa tibuok kalibotan ang nagsugod na pag-administer sa booster shots. Ug kini nga mga nasud, nagpahigayon sa booster shots ngadto sa mga senior citizens ug kining gitawag nga immunocompromised population groups.
Duna koy amigo nga hangtud karon, wala gyud magpabakuna. Iyang rason, hadlok siya sa dagum. Sa ato pa, wa siya mahadlok unsay epekto kon magpabakuna. Arang-arang na lang. Ako siyang giingnan nga ang dagum karon pino kaayo, lahi sa among panahon nga hilabihang dagkoa. Unya, dili disposable, initon pa, aron i-injection sa uban.
After my explanation, mora’g magpabakuna na siya. Imagine, tungod lang gyud sa imong kahadlok sa dagum dili ka magpabakuna? Nag-among-among lang gyud ka sa imong kaugalingon.
Sa giingon ni Vergeire, additional kini nga protection batok sa COVID-19 virus.
Pagkagahi baya gyud nato’g mga ulo uy! Naningkamot ang mga eksperto sa panglawas ug mga siyentifiko nga maluwas kita gikan niining makalilisang nga sakit nga mikutlo na’g daghang kinabuhi sa tibuok kalibutan, apan, kita, igo lang unta sa pagtuman sa angay buhaton, nagdumili pa pag-cooperate nga unta alang man kini sa kaayohan natong tanan.