Septiyembre 14 mao ang pangilin sa Balaang Krus sa atong Ginoo. Ang krus alang sa matang tawhanon nahimong usa ka simbolo sa kauwawan ug kapildihan. Dili tanan mahimong silotan pinaagi sa krus apan giisip nga usa ka dakong kriminal ug maluibon sa nasud. Mao intawon kini ang nahiagoman nga kamatayon sa atong Ginoo.
Mao kini ang nahiagoman nga pagpakauwaw gikan sa mga kamot sa iyang mga kaaway. Mao kini ang matang sa kamatayon diin nagmadaugon si Satanas apan sa samang pagkaagi didto sa balabag sa krus gipukan usab ang karaang kaaway nga mao ang yawa. Mao ni ang hinungdan nga tupad sa eksorsista ang krusipiho nga maoy patutokan sa nasudlan og daotang espiritu pagpahinumdom kini sa yawa nga dili gyud siya magmadaugon.
Sa laing bahin, ang krus mahimong sud-ongon nato ingon nga responsibilidad resultado sa matang sa kinabuhi nga atong gipili. Angayan lamang nga ato kining hangpon. Sa laing bahin, ang krus dili mapapas nga marka sa atong pagka kristohanon. kun wala ang krus dili kita pagatawgon nga Kristohanon.
Sa laing bahin, ang Krus simbolo sa atong kaluwasan busa angayan lamang nga magmpagarbuhon kita niini. Dili nato kini ikauwaw busa angayan lamang nga kita manguros. Ang krus tambal. Kay ang pag-antos ug pagsakripisyo pinasikad sa paghigugma makapahingpit man sa atong inordinate nga pagbati. Kinahanglanon nato ang JOY diin nagpasabot kini og:
- Jesus diin atong tuohan nga kuyog si Jesus sa atong pag-antos.
- Others kun uban. bisan pa man kun daghan kita og suliran dili kini excuse nga moambit sa kasakitan sa uban.
- You hinumdomi gihigugma kita sa Ginoo ug tungod niini giluwas kita! angayan lamang nga bugtian ta ang maong sakripisyo ug paghigugma ug pagkamatinud-anon! Sa Ngalan sa Amahan, Anak ug Espiritu Santo! Amen.