Agosto 1, 2021: Ikanapulog-walo nga Domingo sulod sa tuig
Mga Pagbasa: Ex. 16;2-4,12-15/Sal. 78/Ef. 4;17,20-24/Jn. 6;24-35
Ning panahon sa dakong pandemiya, daghan nato ang gibati og kagutom dili lang sa mga pagkaon nga yutan-on kondili usab sa mga pagkaon nga kalagnon. Anaa kanato karong mga panahona ang tumang kahigwaos.
Walay kasegurohan, ug labaw sa tanan walay kapaingnan.
Kay bisan gani ang bakuna dili man garantiya nga dili ita matakdan labina nga murag nagpunay og mutate ang virus nga si Corona.
Anaa na pud ang Delta variant. Kapoy baya ang pagpunay og tago ug amping ning panahon sa dakong kalisdanan. Apan bisan pa man niini padayon kitang nanlimbasog alang sa mga pagkaon nga lumalabay. Mao nga ning mga higayona, daghanan na karon ang nagpanic buying na.
Ginaingon nga kining mga hitaboa karon sinugdanan pa lamang sa taliabot nga mas malisod pa nga kahimtang.
Moabot ang panahon nga ang tawo mawad-an sa iyang kaugalingong katungod.
Mamahimo siyang i-manipulate niadtong pipila ka mga elitista nga buot moangkon sa kalibotan aron buhaton kutob sa ilang gusto ang kun sa unsa man ang anaa sa ilang hunahuna ug kasingkasing. Sila mismo nga nagpasiugda sa ingon walay katagbawan.
Daghan ang napikal ning mga higayona. Daghan ang naglagot labina sa mga pamunoan nga kondili man gani mopakita sa kadanghag, ang mga tubag sa mga seryosong pangutana himoon mang tulibagbag.
Unya ganahan ka pa niana? Mga tawong modawat lamang og limpiyo apan sa kaalautan sa kinabag-an?
Padayon kitang nanghingutas. Hangtud kanus-a ug asa kutob ang tanan? Ug unta masayud ang kahitas-an ning maong kalisdanan aron sa ingon mamahimong mas magmalinawon ang matag usa ning panahona.