Sa pagbanhaw sa panginabuhian sa mga tawo siyempre dili magpaulahi ang mga kan-anan kay bisan unsaon patok man gyud kini nga negosyo sanglit essential man kini tungod kay mokaon man gyud ang mga tawo.
Gitugotan na ang pagkaon sa sulod sa mga restaurant basta mosunod lang sa mga health protocols kong pila lang ka porsiyento ang tugotan nga makasulod.
Kaniadto murag nasunod pa apan sa kadugayan inanay na usab kining nataligam-an kay mag-apas pud lagi sa mga customers ang kitaon sa mga kan-anan ug yawat nalang makabawi ug makaganansya bisan gamay.
Gawas pa ang mga tawo kompiyansa na usab kaayo nga magdugay sa pagkaon sulod sa mga restaurant kay magsige og estorya dala katawa, tsika to the max nga ma-carried away sa ilang gibati ug nakalimot nga naa pa sa palibot si covid.
Samot na sa mga imnanan nga kong puwede pa lang magbuntagan ayha mag-ukang kay ipalabi ang personal nga lipaylipay.
Dili lang sa mga restaurant apil na sa mga okasyon sa pamilya ug bisan gani sa mga canteen sa trabahoan magsige og tabi ang mga empleyado sagol katawa panahon sa pagpangaon.
Siyempre hilabihan ka delikado sa takod kining maong sitwasyon nga dili na masunod ang lagda kay nakalimot o ba kaha gipakagamay nalang ang hulga sa virus.
Sa monitoring sa Emergency Operation Center sa dakbayan sa Sugbo usa ang mga kan-anan ug mga trabahoan nga tinubdan sa COVID transmission.
Puwede ra man seguro makorehian ang ingon niini nga gipanghimo sa mga tawo. Tugotan gihapon nga makapangaon sa mga restaurant apan limitahan ang oras nga igo lang sa paniudto o panihapon.
Kaon nga wala nay estorya, mobuka lang ang baba kong mohungit sa kan-on ug sud-an, dili man sa magdalidali apan tan-awon pud nga dili magdugay sa sulod sa kan-anan.
Ang tuyo sa pagsulod sa canteen ug restaurant mao man ang pagtambal sa kagutom ug tagamtamon ang kalami sa pagkaon. Dinhi na nato ma-apply ang eat and run policy sa mga kan-anan. Inig serve sa pagkaon hungit dayon hangtod mahuman nga walay tingog tingog, ok ra seguro kong dili matuk-an.
Moingon ang uban nga dili man lumba ang kaon. Tinuod man apan kong mahimo isipon kining usa ka lumba diin ang kaaway mao ang COVID nga dili ka maapsan.
Ang tanan natong gipanghimo karon sama sa usa ka race o lumba nga dili kita maapsan sa atong kontra nga dili makita. Lisod ba gyud kong mag-eat and run kita? Wala lang say tingogay samtang walay sampong nga mask ang baba.
Estorya nalang inig ka human sa pagkaon kanang naka-mask na aron segurado.
Sa mga hilomon makaya ra apan sa mga tabian makaya ra man gihapon. Busa mag-eat and run, kaon hangtod mahuman dayon balik sul-ob ang mask ug gawas sa kan-anan. Niining paagiha, lisod kitang maabtan ilabi na sa mga bag-ong COVID variant.