Nangayo og pasaylo ang World Bank sa Pilipinas human sa gipagawas niining report kabahin sa nangiwit nga edukasyon sa mga kabataang Pilipino.
Ang unang report sa WB nag-ingon nga 80 porsiyento sa mga tinun-ang Pilipino ang dili makamaong mobasa ug nangiwit sa matimatika base sa ilang educational level.
Kini ilang gibase sa tulo ka sukaranan nga diin misalmot ang Pilipinas sa mga programa pagsukod sa kalidad sa edukasyon sa mga tinun-an niini itandi sa ubang mga nasud.
Ang gisalmotang programa mao ang international student assessment niadtong 2018, trends sa international mathematics and science study sa tuig 2019 ug ang Southeast Asia primary learning metrics niadto gihapong tuig 2019.
Apan nasagmuyo ang DepEd sa report tungod kay gipublikar kini nga wala gani pangayo-i og panahom ang ilang buhatan kabahin sa mga hinungdan kun ngano.
Natural gyud nga ikasuko kini sa DepEd ug ni Pres. Duterte tungod kay dili kataw-anan ang 80 porsiyento sa mga tinun-ang Pilipino ang nangiwit sa ilang edukasyon.
Husto sab nga gipasaylo ni Duterte ang WB, kay usa raba kini sa tigpautang sa Pilipinas nga makatabang sa pagpalambo sa edukasyon.
Ang WB miangkon sa ilang kasaypanan pagpublikar sa maong assessment nga wala mohatag og kahigayonan sa Pilipinas pagpasabot sa ilang habig.
Samtang tuod sayop ang gihimo sa WB ug tinuod makainsulto sa mga Pilipino, angay sab tingaling kapunitan kini og leksyon sa mga hingtungdang ahensiya sama sa DepEd.
Una sa tanan, ang Pilipinas maoy nisalmot sa programa ug mao kadto ang resulta. Mahimong dunay mga balidong rason nganong ingon niadto ang resulta nga wala maapil sa gipublikar sa WB.
Apan inay nga magyawit, maayong tutokan ug solusyonan aron mapalambo pa ang kalidad sa edukasyon sa mga kabataang Pilipino ubos niining bag-ong sitwasyon dala sa pandemiya sa COVID-19.