Nagpadala og mensahe si Brod. Cedee Neo nga didto sa Canada laing simbahan na usab ang nahiagom sa kapintas. Ang vandalism ug pagsunog padayon nga nahitabo didto. Subo palandungon nga mas nisibaw ang kaligutgot ug kasilag ning mga panahona karon labina kun maghisgot kita sa mga butang nga dunay kalambigitan sa mga butang sagrado.
May nakita pud ko nga talan-awon diin dunay nagbinugtong nga lalaki ang nanalipod intawon sa usa ka katedral nga buot i-vandalize sa mga sakop sa LGBT-Q community. Gipakita gyud ning mga tawhana nga sila entitled ra kaayo bisan pa man kun nahimong salikwaot na gyud ning mga butanga.
Dunay mga bahin sa pagkatawo nga angayang tahuron apan dunay mga butang dili madala og compromise. Dunay mga butang nga kinahanglang dili dawaton sanglit nahimo man silang supak sa natural law bisan pa og dili kita maghisgot og relihiyon ning dapita.
Ang kasilag sa bisan unsang sagrado matawo man o mabutang o madapit padayong nisibaw hangtud karong mga panahona. Gani dinhi sa ato nahimo mang sentro sa pagpanggukod ug pagbiay biay ang simbahan ug kaparian. Ang maong pagbiaybiay mahimong gamiton diha sa pagsilsil sa mga yanong hunahuna sa gagmay’ng mga bata nga ang simbahan wala na kinahanglana ug dili na essential.
Sa pag-abot sa COVID-19 pandemic nahimong daw mas sayon ang pagsirado sa mga balay alampoanan kaysa mga balay patigayon ingon man mga balay kalingawan. Naapektohan pag-ayo ang espirituhanong kinabuhi sa kadaghanan. Ug labaw sa tanan, ang dakong kuyaw mao nga kun pagaisipon na lang nga relative ug subjective nan, makahimo ang si bisan kinsa sa iyang buot pagahimoon. Mao nga ang matag tawo tinuod entitled sa iyang kaugalingong panahom apan kun makadaut naman lang gani siya sa iyang isigkaingon, nan, dili na sab kini maayo ug makatarunganon.
Mao nga angayang magmaigmaton kita labina gyud ning mga panahona karon. Kay kun unsa kapaspas ang atong paningkamot sa pagbuhat og maayo inubanan ang tinguha sa pagmantala sa Diosnong mensahe, ingon ana usab kapaspas ug mas gidoble pa gani ang paningkamot sa kangitngit aron gun-obon ang bisan unsang gitukod ni Jesu-Kristo ug sa iyang simbahan. Mahimong masunog ang mga balay alampoanan apan pabiling lig-on sa gihapon ang atong pagtuo.