Ang pagmugna og community pantry usa ka dalay’gon kaayong kalihokan kay nagtabang kini ngadto sa mga tawo nga nanginahanglan og tabang.
Dakong sayop ang gihimo sa uban nga isipon nga rebelde ang mga nagpasiugda niining mao nga kalihokan nga gisundog sa uban.
Buyno, bisan pa gani og mga sakop sa New People’s Army (NPA) maoy naghimo niining mao nga community pantry, angay kitang malipay kay nagtabang ni sa pobre.
Para kanako, bisan og mga NPA pa ang nagpasiugda sa community pantry nga gisundog sa uban, angay kini nga daygon basta pagpanghatag ra ang ilang tumong.
Unsa may sayop kon ang usa ka tawo manghatag ngadto sa mga pobre nga wa tawon makadawat og tabang gikan sa kagamhanan?
Apan kon dunay community pantry, kadtong mga tawo nga wa gyud mag-antos sa kalisod, dili unta mopahimulos sa higayon nga moapil usab sa pagpanguha og makaon.
Balikan nato ang isyu sa mga rebelde. Kaniadtong mga 1970s, duna sa’y natabang ang mga rebelde didto sa ubang dapit sa kabukiran.
Ilang gipahimangnoan ang katawhan sa bukid nga dili moabuso.
Ang mga bana nga mangulata sa ilang asawa, gimandoan nila nga putlon na ang ilang batasan.
Ang mga palahubog nga mangaway kon mahubog, gipadad-an og paskin nga magtarong na. Unya, kadtong mga tawo nga kriminal, nakahimo og pagpanglugos, aw ilang gitiklo.
Tungod sa gihimo sa maong mga rebelde, nangahadlok ang katawhan sa bukid nga mohimo og mga salaod. Para nako, kon ingon niana ang buhaton sa mga rebelde, way problema.
* * *
Tungod sa dakong gasto sa Dakbayan sa Sugbo kabahin sa pagtabang sa katawhan tungod sa pag-igo sa coronavirus disease, naapike ang ubang gastohanan.
Sayonan ka nga duna pa’y mga claimants og burial assistance kaniadtong 2019 nga wa pa mahatagi, ug daghan kaayo sa miaging tuig.
Gani, ang mga barangay workers dinhi sa Dakbayan sa Sugbo nga gipagahinan og binuwan nga honorarium gikan sa City Hall, wa na gyud mahatagi sukad kaniadtong Enero.
Dunay mga nangayo’g tabang gikan sa CHAMP, nga refund sa ilang nagasto, nga wa pa gyud mabayari dugay na.
Mao kini ang resulta kay nahubsan na ang panudlanan sa siyudad.
Daghang proyekto nga gitan-aw unta nga ipatuman aron makabenepisyo ang katawhan nga wa na madayon kay ang kwarta nagasto man sa COVID-19 response.
Mao nga kitang katawhan, kinahanglang motabang aron nga masanta ang pagsulbong pagbalik sa gidaghanon sa mga kaso sa coronavirus disease dinhi sa siyudad.