Gifted to Give ang ulusahong tema sa atong kasaulogan sa 500 years of Christianity. Hagit alang kanatong tanan. Hagit tungod kay kuyog sa maong awhag ang urgency sa paghimo niini ingon nga reyalidad.
Kitang tanan mga hinigugma sa Dios. Gani, tabunok sa simbolo ang ritwal sa bunyag nga mao ang pagdihog sa Krisma kay ang maong pagdihog nagkahulogan man og pagka pinili.
Gipili kita aron sa ingon mamahimong angkonon nga iya sa Dios. Sa ato pa, gipanag-iya kita sa Dios. Kining gihimo nato karon usa lamang ka pagpadayag sa atong dakong pasalamat sa Dios tungod sa gasa sa bunyag nga iyang gihatag kanato. Gifted to Give. Ang paghatag ug pagpaambit sa bisan unsang nadawat nato gikan sa kahitas-an. Unsa man kaha ang atong mahatag ingon nga pasalamat?
Atong awaton ang gipakitang baruganan sa atong unang Pilipinong Santos nga si Lorenzo siya nagkanayon: “Nga bisan kun duna ako’y liboan ka mga kinabuhi, ang tanan akong ihalad ngadto sa Dios! Ang pagkamanggihatagon dili lang kalabot sa salapi ni bahanding material.
Hinunoa ang pinakadakong pahat nga mahatag kanato ngadto sa Dios mao man ang atong panahon.”
Panahon sa pagpaminaw sa iyang pulong nga makaluwas. Panahon sa pagsaulog sa mga sakramento nga maoy kinabuhi nato ingon nga katawhan Niya, panahon sa paghimo og maayo aron dili mamahimong patay ang atong pagtuo. Panahon sa pagbag-o dili tungod kay hadlok kita og impiyerno kondili tungod kay gimahal nato ang Dios.
Dili pa lang dugay gimbuksan na gyud ang Tuig sa Grasya. Abril 4, 2021 nahimong tulukibon ang tanan sa dihang matag parokya sa tibuok artsiyodesesis ang nihimo og pagbendisyon sa mga Jubilee Crosses ingon man ang pag abli sa mga designated Jubilee Doors sa mga karaang mga simbahan ug mga parokya sa atong local nga simbahan.
Daghan ug nahimong mabulokon ang pagpangandam aron mamahimong makahuloganon usab ang pagsaulog niini sa tibuok tuig, dili lang sa mga ritwal kondili sa mga lakang nga maisip natong mas konkreto ug haom sa panginahanglan sa kasamtangan.
Kay ang ana man gyud ang pagtuo kinahanglang ipaagi sa buhat kay ang pagtuo nga walay buhat patay man nga pagtuo dili ba?