Saksi ang kagabhion

Ganahan kaayo ko kun gabii na. Gawas nga wala nay schedule, husto na pud nga ipahuway.

Ning paagiha nahimong makahimo ako sa akong mga personal nga hilig sama sa pagbasa, pagpamalandong.

Bugtong tingog sa gangis ingon man ang balod sa dagat maoy nipatagamtam kanako sa gikahinaman kong kahilom.  Daghan kaayong pressures, pun-an pa sa mga tawong samokan nga padayong mohasol kanato.

Ang kagabhion panahon sa pakigkukabildo sa Ginoo ug namasin lamang nga kining yano ug kabus nga tawo patalinghogan labina gyud sa mga panahon sa akong pagbakho.

Dili ba nindot nga bugtong dan-ag sa sugang dagitab nga nakapunting sa krusipihong nagbitay? Pahinumdom sa kang Kristong pagdaug gikan sa gahum sa panuway?

Ning panahon sa Kwaresma nahimong daw tambal ang pandemiya.

Kay ang pandemiya nga gikan sa Tsina naghatag man kanato sa kahigayonan nga mapugos sa pagdistansiya gikan sa uban.

Pagdistansiya basin unya og matakdan ang matag usa nga magpaduol aron lamang makighimamat.

Ang pakighimamat nahimong lamat ug dili na pasalamat. Panahon sa kagabhion giduaw kita sa tutulo ka mga espiritu.

A.  Espiritu sa kaulag dili tungod sa biga kondili tungod sa kalaay mao nga mangita gyud og kapahungawan ang si bisan kinsang nahiagom sa kawalay kasegurohan.

B. Espiritu sa kasuko ngadto sa Dios dili tungod kay nawad-an ka og pagsalig niya kondili tungod sa imong dili nindot nga mga kasinatian nahimong daw malisod alang kanimo sa kasamtangan ang pagsulod sa presensiya sa Dios kay ang imong kasingkasing nagdumili man sa ingon.

C. Espiritu sa kalibog labina sa paghimo og mga mahinungdanong desisyon sa imong kinabuhi ning panahon sa dakong pagsulay.

Usahay nagtuo sila nga nahimong daw hayahay ang imong kinabuhi tungod kay nahimutang ka sa dapit nga hayahay tan-awon apan lisud diay puy-an.

Mahukmanon ang kalibotan apan bisan pa niini padayon unta kitang maningkamot nga makita sa gihapon ang Dios taliwala sa mangitngit nga kinabuhi.