Samtang dako ang pasalig sa China nga wala kini planong piiton o mangita og gubot sa mga silingang nasud, apan sukwahi kaayo ang ilang gibuhat sa ilang gipanulti.
Sa dihang milingkod si Chinese president Xi Jinping nagsugod sab ang paghingusog sa ilang mga kalihokan sa sud ug gawas sa ilang nasud,nga ang tumong mao ang dominasyon sa tanang suok sa kalibotan.
Samtang tuod ang dakong pahat niini nga mga kalihokan may kalabotan sa ekonomiya, siyensiya, medisina, wala sab magpaiwit ang ilang politikanhong katuyoan sa Asya Pasipiko.
Gamit ang kwarta, impluwensiya ug militar malamposon nila kining nakab-ot nga walay bisan usa ka buto sa armas.
Makita nga gigamit sa China ang tanang kahimanan nga naa niini aron kutob ra sa tiyabaw ug reklamo ang mabuhat sa mga nasud nga gipuntariya niini.
Usa niini mao ang ilang gibuhat sa West Philippine Sea ug sa tibuok South China Sea. Ang pugsanon nilang pag-ilog sa mga teritoryo pinaagi sa abilidad sa ilang moderno ug daghag gamit.
Samtang nagsige ang pakig-diplomasya sa mga silingang nasud sa tanang aspeto nagsige sab og lihok ang uban nilang departamento pagkab-ot sa ilang tuyo.
Kaning ilang diplomatikong maniubra takuban lamang sa tinud-anay nilang tumong. Ang modominar sa kalibotan ug way laing paagi niini kondili ang
Kinahanglang magmatngon ang mga kanasuran sa mga gipanghimo sa China. Gawas nga adunahan na karon, sila ang dunay labing dako nga pwersa militar.
Dili man tuod sama ka sopistikado ug kapabilidad ingon man kasinatian sa pakiggubat kun itandi sa Amerika, nagkagamay ang gintang sa duha.
Daghan ang nagtuo nga kun dili mohimo og mga lakang ang ubang kanasuran batok niining pagpahimulos sa China, dominahon nila ang tanan ug kun kini mahitabo lisod na kining pakgangon.
Mentras wala pa kini mahitabo ug wala pay giyera nga niulbo, kinahanglang molihok na ang tanan pagpakgang niini. Sukwahi kaayo ang China sa Amerika. Dili kini matawag nga "peaceful rise" nga maoy ilang pirmeng gipamulong sa kalibotan.