Human sa inisyal nga pagpangbakuna sa mga opisyal sa rehiyonal nga buhatan sa Department of Health ug mga health personnel sa Vicente Sotto Memorial Medical Center sa niaging semana, walay mitumaw nga major side effects nga ilang nasinati.
Ug nagpasabot lamang kini nga epektibo gayud ang bakuna sa Chinese company nga Sinovac batok sa COVID-19. Kahinumdoman nga daghan ang nagduhaduha pagpabakuna sa Sinovac vaccine tungod kuno sa ubos nga efficacy rate niini kon intandi sa ubang bakuna.
Tungod niining maong kalamboan, gipangagpas sa nasyonal nga pangagamhanan nga mas daghan unya ang magpatusok sa Sinovac vaccine dinhi sa nasud, ilabina nga dali ra ang negosasyon sa gobiyerno pagpalit sa maong bakuna gikan sa China.
Hinuon, gawas sa Sinovac, adunay moabot dinhi sa Sugbo nga bakuna gikan sa AstraZeneca. Sumala pa sa taho, ang AstraZeneca vaccine maoy itusok niadtong mga frontliners nga nagpangedaron og 60-anyos pataas.
Matud pa ni Department of Health-7 spokesperson Dr. Mary Jean Loreche, ang Sugbo makadawat unya og dili momenos 20,000 doses sa AstraZeneca. Hinuon, wala pay petsa kon kanus-a gayud moabot dinhi ang maong bakuna.
Karon nga miarangkada na ang mga pagpangbakuna dinhi sa Sugbo, dako atong pagtuo nga sa dili madugay, makontrolar na ang hilabihan ka lapad nga pagkatap sa COVID-19 dinhi. Ug hangtod nga mapapas na gayud sa katapusan ang maong virus.
Apan mabuntog lamang kining maong makamatay nga balatian kon mohunong na usab kining mga badlongon sa katilingban kinsa padayong nagmagahi pagsunod sa mga health protocol nga giimposar sa kagamhanan batok sa COVID-19.
Gani gikan pa sa pagsugod ning tuiga, consistent kaayo ang pagsaka sa mga bag-ong kaso sa COVID-19 sa dakbayan sa Sugbo, Metro Cebu ug sa lalawigan gumikan sa walay kontrol nga pagpanggawas sa katawhan sukad pa sa kasaulogan sa Pasko.
Gawas sa bakuna, ang gikihanglan mao ang displina sa matag usa. Aron paglikay sa maong sakit, wala gyuy kumo sa pagsunod sa lagda ug ubang pahimangno sa otoridad ning panahon nga ania pa kita sa community quarantine.
Apan dili gayud magsilbi ang bakuna kon kulang kita sa disiplina. Mao nang angay lamang gayud nga pahugtan pa ang atong bakos batok sa coronavirus disease. Kay mag-unsa man ang bakuna kon padayon ang pagsaka sa mga kaso sa coronavirus disease gumikan sa pagkagahi sa ulo sa uban nga maoy hinungdan sa walay hunong nga tinakdanay.