Gibati ko ang tumang kasubo sa dihang nasayod ko sa pagtaliwan ni Sir Dodong Gullas, ang amahan ning atong pamantalaan. Sa tinuod lang panagsa lang gyud mi magkakita ug kun nagkatabi man kadiyot ra pud. Kinit ungod kay wala matugot sa kahigayonan.
Apan mapasalamaton gihapon ako sanglit gawas ni Sir Juanito Jabat, ang mapinanggaong magtutudlo, si Sir Dodong usab ang dunay indirekta mente nga gipakitang sanglitanan nga angayang sundon ug panaminan. Ug kini ang dakong gugma sa kulturang Sugbuanon.
Gimahal niya ang Sugbo nga tungod niini ginamit ang iyang dagang ug kaikag sa katitikan namugna kining maong mantalaan The Freeman ug ang Banat News alang sa kinabag-an.
Ang iyang gugma alang sa musika maoy nakapadasig niya sa paghimo og Museyo diin nakapunting lamang sa mga Sugbuanong honi.
Dili man tuod daghan ang mosulod aron molili niini apan niadtong wala pay COVID-19 moadto gyud ko aron mabusog sa mga pagtulon-an ug pagpasabot sa in charge sa maong museum.
Dugang pa si Sir Dodong mahigugmaon usab sa simbahan. Sa akong nadunggan dako kaayo siya og natampo aron mamahimong malampuson usab ang katukoran sa usa sa mga inprastraktura agi’g pasidungog kang Mons. Camomot.
Daghan sa mga tawo karong mga higayona ang walay pagtagad sa kagahapon.
Alang nila daw usa lamang ka dakong urom kun maghunahuna kita sa atong kagahapon. Ang nahikalimtan nila mao nga kun wala ang kagahapon wala pud unta kita karon.
Daghan kaayo ang wala maghatag og igong pagtagad niini busa wala kita magsapayan kun ang mga handumanan sa karaan ang pagatumpagon lamang sa mga tawo nga sa unang bahin migawas nga maayo ug manggihatagon apan mao ra diay nigisa kanato sa atong kaugalingong mantika.
Mga tawong malinglahon ug mamugos ra baya gyud sa ilang mga kawsa nga nahimo nang duplikasyon sa mga naandang mga balansayon.
Tingali aron pagpakita kunohay sa ilang mahinulsolong pagbakho samtang kanhiay nga simbolo sa karaang luyonganan sa paglaum sa sidlakan nahimong simbolo sa caricature sa atong sipyat nga lisud mapapas sa tawhanong kasaysayan.
Lisud papason hangtud anaa pa ang mga malimbongon sa atong palibot. Salamat kaayo Sir Dodong kay nagpakabana ka sa kulturang Sugbuanon mahimong lisud dawaton alang sa mga mata sa ekonomista ang maong mga lakang apan sayud ko nga nalipay ang Dios sa kalunsay sa imong tumong.