Samtang nagkadugay, nagkaanam og kaanad ang mga tawo nga dunay coronavirus sa palibot. Ug tungod sa kadaghan na sa mga nangataptan unya kadaghanan mga asymptomatic o kadtong wala gyuy sintomas nga gipamati sa lawas gipakasusama nalang kini sa uban nga ordinaryong ubo o trangkaso.
Mahimong sakto ang ilang hunahuna tungod kay kaya ra man sa ilang resistensiya sa lawas. Sa laktod, himsog og mga lawas kaning mga nataptan nga walay mga sintomas apan peligroso kaayo kini para sa uban nga dunay mga sakit nga gihambin.
Gikan sa pagsugod sa pandemiya sa miaging tuig, wa may nabalita nga nakalas sa coronavirus nga walay laing sakit. Sagad sa mga nakalas mao kadtong dunay comorbidity o may sakit na silang daan unya nagrabehan lang tungod sa pagkasakit nila sa Covid-19.
Sa laktod murag komplikasyon, naluya ilang lawas pagkombate sa daan na nilang gihambing sakit tungod kay ang ilang pangdepensa o kung unsay nahibiling resistensya sa ilang lawas kinahanglan man sab moatubang sa virus sa Covid-19. Dili maayong magpaka-kampante ang publiko nga sila lig-on og lawas tungod kay makasugakod sila, apan unsaon nalang ang mga masakitong miyembro sa pamilya o katong mga senior citizen sa balay?
Dili nalang unta magsige og reklamo bahin aning mga paghigpit sa gobiyerno pagpasunod sa minimum health protocols. Angay hinumdoman sa tanan nga kaning paghigpit para kini sa tanan, sa mga himsog ug sa mga masakiton. Kung kinahanglang magsuot pirme og facemask sa gawas sa panimalay kinahanglan gyud kining sundon ug dili magmagahi kay dili kini para lang sa tawong gimandoan pagsuot ani.
Tungod kay ini og uli sa balay natural naman nga dili magsuot og facemask , unsaon nalang kung nagtaptan na diay og virus kay wala magsuot og facemask o nakigdinutdotay sa mga tapok-tapok nga diay to, dunay carrier na sa coronavirus nga nasagol? Kung dili ganahan ang mga tawo aning mga gipadungog-dungog nga lockdowns, mas maayo tingaling mosunod una ang tanan sa mga health protocols. Dili mapaubos og lockdowns ang lugar kung dili makaalarma ang gidaghanon sa mga nataptan sa maong virus.