Ang Adlaw sa Managhigugmaay tinghatag og nagkalainlaing regalo ngadto sa ilang gimahal. May mohatag og pungpong sa mga bulak, mahalong chocolates nga pormag kasingkasing, sinina ug uban pang matang sa Valentine’s gift.
Sagad sa mag-date niining adlawa, magsugod sa pagpangaon sulod sa restawran, diin ang boyfriend magdalag gasa alang sa iyang girlfriend.
Huma’g kaon, kon abli pa ang sinehan, manan-aw silag salida.
Unya, kon sayo pa (wala pa mogabii) sa ilang paggawas tapos motimotimo og painit didto sa sulod, modalikyat sila’g adto sa lover’s lane aron magpaabot sa kangitngit ilawom sa dakong landong sa kakahoyan kang kansang palibot gisayawsayawan sa nangalimyong mga bulak nga gihasmagan sa huyohoy sa kahaponon.
Sa mag-uyab nga gikulang sa budget, ang Plaza Independencia o ubang romantikong lugar maoy gihimo nilang paraiso panahon sa Velentine’s Day.
Hinungdan, nga ning giatubang tang makalilisang pandemiya, gibantayan gyod kining mga dapita sa kapolisan.
Kay basig hugpaan sa daghang love birds nga magpinarayganay. Diin, sa walay hunong pagtinusikay, ilupad sa hangin ilang mga laway ug delikado na hinuon, ang pagtinakdanay.
Apan niadtong kuwartahang managhigugmaay, sila makapili asang motela o hotela ipadayon ang nasugdang paghinatagay sa gisaad nilang Valentine’s gift sa matag usa – ang pagtugyan sa ilang tanan.
Mao kini ang naandang rota sa manag-uyab kada Valentine’s Day: Hatagag regalo ang uyab, dad-og kan-anan, isulod sa sinehan, isuroy sa lover’s lane, unya itsek-in sa motel/hotel ug idulog sa pribadong higdaanan aron buksan ug angkonon sa hingpit ang gikahinamang regalo sa usag-usa.
Lunlon kalipay kaha ang sangpotan niini?
May estudyanteng dalaga, gipabulagan sa mama iyang boyfriend kay lagi bata pa sila. Usab, wala maayoni sa inahan ang lalaki. Aw, milayas-palayo ang boyfriend sa dalaga.
Ang pait, kay nabuntis ang babaye. Unya, sa grabeng kasuko sa inahan, kinsa gikaulaw kaayo ang maong hitabo, wala na niyang isipang anak ang dalaga. Gani, iya pang gipalayas. Hangtod, nga nakahunahuna na lang ang babaye sa paghikog.
Kini igo nang makapahayag nga dili gyod diay maayong ihatag ang pagpakighilawas isip usa ka regalo ngadto sa uyab.
Kay dili gyod kini maghatag og maayong bunga sa umaabot nga mga adlaw. Ug labaw sa tanan, nakasupak og dako sa kabubot-on sa Ginoo.