Pagkanindot sa gihimo ni Cebu City Councilor Jerry Guardo nga siya ang nangunay pagpaguba sa mga illegal structures nga gitukod diha sa mga aseras ug ang uban gani, anaa na gyud sa mga karsada.
Gituman usab niya ang panultihon nga kon manilhig ka, unaha usa ang pagsilhig ang mga sagbot nga anaa sa nataran sa imong panimalay.
Tungod niini, giuna niya ang mga illegal structures sa Barangay Sambag 1.
Si Konsehal Guardo ug ang iyang asawa nga si Aileen Guardo nga maoy kapitan sa Barangay Sambag 1, wa gyud mahadlok nga mangasuko kanila ang katawhan nga naapektohan sa ilang pagpahigayon og clearing operation.
Dinhi nahunahunaan nako kon nganong dili man hatagan og “executive function” ni Mayor Edgardo Labella ang ubang mga konsehal sa siyudad aron nga sila usab ang mohimo og clearing operations sa ilang dapit?
Samtang nagtan-aw ko sa hulagway nga gipangguba na ang mga tindahan ug kabahin sa kabalayan nga anaa gitukod sa aseras, gibati ko og kalipay kay moresulta man kini sa paglapad sa atong karsada.
Sa ato pa, mas daghan ang makapahimulos, dili ra ang pipila ka mga mapahimuslanon sa higayon nga maoy mga tag-iya sa mga illegal structures.
Apan, pila ra kaha ka konsehal nga ingon niini og panglantaw ni Guardo nga dili mahadlok nga kadtong mga naapektohan dili na mobotar kaniya?
Sultian hinuon nako si Guardo nga ang mga tawo nga naapektohan sa iyang clearing operations, dili makapilde kaniya kay pipila ra sila, kon itandi sa mga tawo nga nalipay nga nagpaniid lang sa iyang maayong binuhatan.
Sama nako, kon may eleksiyon, aw sigurado nga mobotar gyud ko ni Guardo kay nakita man nako nga maayo siya nga moserbisyo.
May ihatag hinuon ko nga tahas ni Konsehal Guardo, kay wa man gyud ni mahimo sa PROBE Team, nga palihug panggub-a ang mga illegal structures nga anaa gitukod sa aseras sa Lakandula Street, B. Aranas Street, Tres de Abril Street nga anaa dapit sa Taboan.
Kon dili kini tagdon ug sementohon na unya ni sa mga mapahimuslanon sa higayon, maglisud na gyud ta Sir. Tan-awa ang atubangan nga bahin sa Taboan Public Market, makita nimo nga ang aseras giapil sa pagkural sa tag-iya sa panimalay.
Unsay ilang katungod nga kuralon man ang aseras? Ang aseras diha sa Lakandula ug B. Aranas Streets, lapad pa kaayo kaniadtong mga 1970, ug suheto ko niini kay diha ko magpuyo sa karaang botika eskina sa maong mga karsada.
Karon, wa na ang maong lapad nga aseras tungod sa mga tawo nga mapahimuslanon sa higayon.