Kon ania pa gani ang coronavirus disease atol sa kampanya alang sa 2022 Elections, posible nga idili ang pagpahigayon og face-to-face campaign sa mga kandidato.
Nagpasabot nga ang pagpangampanya sa mga kandidato, anha ra unya himoa sa radio, TV, newspapers ug sa social media. Ang kampanya sa mga kandidato gikatakda nga magsugod sa Enero 9 sunod tuig.
Ang pag-file sa mga Certificates of Candidacy sa mga kandidato pagahimoon karong Oktubre. Dunay miingon nga ang makabentaha kon idili ang face-to-face campaign mao kadtong mga kwartahan nga kandidato.
Kini kay makasugakod man sila paggasto aron ipahibalo sa mga botante ang ilang tagsatagsa ka mga plataporma aron pagkumbinsir sa katawhan nga sila botohan.
Ambot lang kon unsaon kaha paghimo niini kon estriktohon gyud sa pagpatuman ang balaod nga ang usa ka kandidato mogasto lang bali’g P3 sa usa ka botante sa dapit nga anaa siya magpapili.
Tan-aw nimo, mahimo kaha ni? Ikaw, unsay imong baruganan, pabor ka ba nga idili ang face-to-face campaign sa mga kandidato?
Dunay opisyal sa Comelec nga miingon, basin itugot ang face-to-face apan kinahanglan nga tumanon gyud ang social distancing. Kalisod niini himoon no? Kon ang usa ka kandidato magdala og mga ilado kaayong artista aron sila hugopan sa mga tawo, mapiog kaha sa mga polis ang katawhan?
* * *
Si Senador Panfilo Lacson miingon nga ang sunod nga presidente sa nasud, makapanunod og hilabihan kadako nga problema. Ang utang kuno sa nasud gikan sa mga langyaw’ng tigpautang miabot na og P12 Trilyones; unya anaa pa gihapon ang problema sa COVID-19; ang paghagba sa ekonomiya; pagsiaw sa kurapsyon, drugas, ug padayong kagubot sa mga rebelde ug sa mga terorista.
Gawas niana, miabot na kuno og 17 percent ang unemployment problem sa nasud nga misangpot sa grabeng kagutom sa kaliboan ka katawhan.
Nganong maglisud man ang nasud sa pagbarug? Kini tungod kay hinay ang atong revenue collections kay unsaon man, anaay daghang kurakot sa mga kawani sa kagamhanan.
* * *
Naluoy ko ni Konsehal Niña Mabatid kay nakabasa ko sa social media nga gidaot siya pag-ayo. Daghang pasangil kaniya nga kuno nanguwarta gamit ang iyang posisyon sa kagamhanan.
Dihang gipangutana nako ang konsehal niini, iya kong giingnan nga “troll” kuno ang naghimo niini ug nagpadayon na ang kapolisan pag-imbestigar aron mailhan ang mga tawo nga responsable. Tan-aw nako, mosamot gyud ang paghimo’g mga pagdaot kang Konsehal Mabatid kon modayon siya pagpapili pagka kongresista sa Cebu City north district sa election karong sunod tuig.