COVID-19 misiaw na gyud!

Dili na katiawtiawan ang problema sa Coronavirus Disease (COVID-19) dinhi sa Dakbayan sa Sugbo kay bisan si Konsehal Joy Augustus Young napositibo sab.

May lain pa nga tulo ka staff sa mga konsehal sa Dakbayan sa Sugbo nga apil sab nga nagpositibo sa mao nga virus sa miaging semana.

Unya, ang rekord sa Department of Health (DOH) nagpakita nga kapin na sa usa ka libo ka tawo nga natakboyan og COVID-19 nga anaa pa karon sa mga ospital.

Giingnan ko sa mga amigo nakong konsehal nga gi-disinfect pa ang ilang mga opisina aron nga mangamatay ang virus kay may napositibo man sa ilang sakop.

* * *

Dili diay tinuod ang mga intriga nga si Vice Mayor Michael Rama moatbang paglansar pagka mayor batok ni Mayor Edgar Labella.

Matud ni Rama nga dili siya moatbang kang Labella, kana kon ang mayor makahukom nga magpapili siya pagbalik sa eleksyon karong tuig 2022.

Naghisgot man gud mi si Rama kabahin sa mga tabi-tabi nga moatbang kuno siya kang Labella pagkamayor. Buyno, nindot kaayo nga dili sila mag-ilog sa katungdanan kay kon himoon nila ni, makabentaha ang ilang kaatbang.

Anugon lang kay wa kaayo makalihok si Mayor Labella sa pagpatuman og mga proyekto karong tuiga, kay unsaon, nagsamok-samok man sab ning problema kabahin sa COVID-19.

* * *

Sa among pagsultihanay ni Konsehal Jerry Guardo, iyang gibutyag nga nalangay sila sa pagpanghawan sa three-meter easement sa kasapaan aron pagsulbad sa paglunop dinhi sa dakbayan.

Ang akong awhag nga ang kadagkoan sa City Hall, pinaagi sa akong amigo nga si City Administrator Floro Casar, modestino gyud og iyang sinaligan nga mapalihok kining mao nga proyekto.

Angay’ng himoan na og lakang nga mabungkag ang mga illegal structure nga anaa sa agianan sa tubig, ilabi na diha sa sapa nga milagbas sa Sikatuna Street ug modugtong sa sapa sa T. Padilla.

Tungod sa maong sapa nga gikan sa likud nga bahin sa Day-as Barangay Hall, maglunop ang bahin diha sa Barangay Parian kay gamay na man kaayo ang sapa tungod sa mga bentahoso.

Klaro kaayo kini diha sa taytayan nga anaa milagbas sa Sikatuna Street nga nigamay na kay ang building nianang nagnegosyo og puthaw, misibog na ngadto sa sapa. 

Angay kana nga gub-on ug ibalik ang naandan nga gidak-on sa sapa aron nga kon magbaha, modagayday ra ang tubig ngadto sa sapa sa T. Padilla.

Kon dili kini masulbad, ang lunop diha sa Bonifacio Street paingon sa Parian, dili gayud masulbad.