Dako kaayo og matabang sa kakuwangon sa transportasyon sa mga pasahero sa Cebu City kung ang mga tradisyonal nga jeepneys gikan sa silingang mga lungsod tugotan nga makasulod sa siyudad.
Kini tungod kay nakita ang grabeng kalisdanan sa mga nanarbaho gikan sa silingang mga lungsod sa ilang pagbalhinbalhin og sakyanan sa pagtambong sa ilang mga trabaho dinhi sa Cebu City.
Gawas pa, mas dako ang risgo sa mga pasahero niining pagbalhinbalhin og sakyanan padung sa trabahoan ug pagpauli sa ilang mga lungsod.
Nakita sa Cebu City Jeepney Task Force pinangulohan ni Konsehal James Cuenco ang kadako sa kakuwangon sa masakyan sa mga tawo. Ang Cebu City ubos na sa modified community quarantine ug daghan ng mga balay patigayon ang nibalik na pangabli.
Karong nagsingabot ang Pasko mao usab ang adlaw nga daghang mga tawo ang modagsa sa siyudad aron mangompra.
Makapalagsik sa ekonomiya sa siyudad kining aktibong paglihok sa komersyo human sa pipila ka buwang pagpanirado sa daghang balay patigayon tungod sa mga quarantine restrictions dala aning pandemiya sa coronavirus.
Ang importante lang gyud nga kinahanglang mosunod ang tanan, pasahero, drayber, konduktor ug ilang operators sa minimum health protocols sa ilang pagbiyahe.
Kinahanglan sab nga tanang mga drayber napaubos sab sa swab test sama sa gihimo sa Cebu City sa mga drayber sa TPUJs nga gihatagan og special permits aron makapamasahero sa siyudad.
Kung unsa ka estrikto ang guidelines nga gipasunod sa mga drayber sa Cebu City, mao usab ang ipatuman ug kinahanglang sundon sa mga drayber sa gawas nga molahos sa maong siyudad.
Dawaton man o sa dili, kinahanglan gyud ang dugang transportasyon para sa mga tawo, tungod kay dili mopaspas ang pagbangon sa ekonomiya kun nagkamang ang paglihoklihok sa mga nalambigit sa komersiyo sama sa mga mangomprahay ug mga trabahante.