Duna ko’y mensahe ngadto sa mga senior citizens dinhi sa Dakbayan sa Sugbo nga magdawatan og cash assistance gikan sa kagamhanan sa siyudad.
Paghuwat lang gyud mo, kay kon pananglit ang paghimo sa mga cash cards gikan sa Land Bank of the Philippines (LBP) dili pa mahuman, mahatagan ra gyud kamo sa inyong cash assistance sa wa pa ang Pasko.
Mihimo ko niining maong awhag kay kanunay ko nga makabasa nga daghan kaayong senior citizens ang nagyawyaw nga ngano kunong wa pa ipanghatag ang cash assistance nga para kanila.
Kalma lang mo kay ang kagamhanan sa Dakbayan sa Sugbo naninguha nga mapasayon ang paghatag sa inyong cash assistance pinaagi sa cash cards, apan ang kalangan naggumikan ra usab kay daghang seniors ang dili maantigo nga mo-upgrade sa ilang rekords pinaagi sa on-line.
Mao nga ang LBP dugay sab nga nakasugod sa pagpangimprinta sa cash cards, kay gisuroy pa man ang mga seniors sa ilang tagsa-tagsa ka kabalayan. Kon ang tanang seniors mi-update pa sa ilang records pinaagi sa on-line nga sila ra, aw dali ra unta kadto.
Apan sagdi lang kay sigurado ko nga ang kadagkoan sa Office of Senior Citizens Affairs (OSCA) mangita gyud og paagi, ug kon dili pa mahuman ang pag-imprinta sa mga cash cards, basin og ipanghatud na lang sa inyong kabalayan ang tag P4,000 para sa buwan sa Septiyembre, Oktubre, Nobiyembre ug Disyembre.
Huwat-huwat lang mo kay dili man gyud obligasyon sa City Hall ang paghatag og cash assistance sa mga seniors, apan naluoy lang sila, mao nga paabuta lang ninyo ha?
Mahatag ra lagi gyud na.
Ang bahin sa mga PWD, nagsugod na pagsuroy ang mga kawani sa City Hall sa ilang kabalayan sugod kagahapon ug molungtad kini sa Disyembre 15.
Kon dili mo makakubra kay wa mo sa inyong mga balay, basi sa Executive Order nga dili na gyud kamo makakubra pa.
* * *
Niuli na dinhi sa Cebu City kagahapon si Kongresista Raul Del Mar, apan subo kaayo kay usa na lang kini ka abo.
Mosugat man unta ko niya kay aron nga bisan sa katapusang higayon, akong masud-ong ang bayhon sa akong amigo, nga bisan dili mi ig-agaw, apan magtawganay mi og “agaw.”
Apan pagkasayod nako nga gi-cremate na diay tawon si “Agaw Raul Del Mar” ug abo na lang ang gidala dinhi balik sa Cebu, nakahukom ko nga dili na lang mosugat.
Para kanako, wa nay kapuslanan pa nga mosugat ko kay dili na nako makita pa ang iyang bayhon. Ang akong gihimo, gitutokan na lang nako ang iyang hulagway ug sa hilom nag-ampo nga mahilangit unta siya.
Maayong pagpanaw “Agaw Raul Del Mar.”