Intriga

Sa iyang labing awahing pag-atubang public address gipasidan-an ni Presidente Rodrigo Duterte si Bise Presidente Leni Robredo nga dili makigkumpetensiya niya. Nibahad siya’ng waswasan si Robredo kun may plano ni nga molansar  pagkapresidente sa umaabot nga eleksiyon sa tuig 2022.

Gani mipasiuna siya pagpasupot og malisyosong pangutana kun asa magsuroy-suroy ang bise presidente panahon sa kagabhion ug kun kang kinsang panimay siya mopauli , kun usa ra ba ka pinuy-anan ang iyang paulian.

Tubag ni Duterte sa nagtrending nga hashtag diha sa social media---#nasaanangpangulo---diin ang bise presidente maoy iyang gipasanginlang nagpaluyo niini.

Unsaon nga mas nakit-an man ang bise presidente miduaw sa mga dapit nga naigo sa mga bagyong Rolly ug Ulysses. Napungot si Duterte niini ug midepensa sa iyang kaugalingon nga wala siya magpasagad.

Matud niya nga duna lang siyay laing giatiman atol sa pag-igo sa bagyo sanglit mitambong siya sa APEC Summit.

Ambot nganong nisantop sa huna-huna ni Duterte nga nakigkumpetensiya si Robredo niya. Iyang bise presidente si Robredo ug ang buhatan sa bise presidente kabahin sa istruktura sa atong gobyerno. Ang tabang gikan sa buhatan sa bise presidente tabang gikan sa gobyerno ug dili personal ni Robredo busa way kumpetensiya niini.

Kun natandog ang garbo sa presidente nga mas nakit-an ang iyang bise presidente didto sa mga dapit nga naigo sa katalagman kay sa niya, dili pa awahi ang tanan. Mamahimong moduaw siya didto ug ihatud personal ang gikinahanglang tabang sa mga biktima sa bagyo.

Sa akong tan-aw dunay mga alipores sa presidente nga na-insecure sa gibuhat sa bise president ug nagpataka og pahaba. Wala ko kadungog ni Robredo nga nangutana og hain si Duterte sukad sa pag-igo sa pandemya ug sa sunod sunod nga mga bagyo.

Kalaki ni sa mga political operators sa duha ka kampo nga inay makatabang aron magkahiusa ang mga opisyal sa atong nasud ug magtinabangay paghimo sa mga gimbuhaton pagpadali sa pagbarog og balik gikan sa katalagman, nagsugnod hinuon sa dakong daob sa pagkabahinbahin sa atong mga lider.

Di ron panahon sa pagpangintriga, hinonoa karon maoy tukmang higayon nga atong ipakita nga ang mga Pilipino labaw kay sa bisan unsang krisis ug politika, lig-on ug nagkahiusa.