Dunay mga kabalaka sa pipila ka mga sektor batok niining pagluag na sa pipila ka mga restriksyon sa quarantine protocols pabor sa paspas nga pagbangon sa ekonomiya sa lokal ug nasudnong ang-ang.
Ang kabalaka normal lamang tungod sayod man ang tanan kun unsa kabangis ug kun unsa kadaling motakboy sa novel coronavirus. Partikular sa mga nabalaka ang naa sa medical field nga maoy frontliners batok sa maong sakit.
Apan dili man mahimong hangtud sa hangtud nalang magtago ang mga tawo sa ilang mga balay tungod sa pandemiya. Kinahanglang manginabuhi.
Ang pandemiya mipatibugsok na og maayo sa ekonomiya sa nasud ug sa mga lokal nga negosyo gumikan sa mga gipatumang mga lockdowns tungod sa pagkuyanap sa virus.
Kay dili man mahimong dili mopadayon ngadto sa unahan subay sa gusto sa nasudnong gobiyerno, ang mga local government units kinahanglan sab nga mosanong niini.
Apan naa ra na sa mga opisyales sa mga LGUs kun ang tanang sugyot o resolusyon sa Inter Agency Task Force ilang sundon o ipatuman sa ilang lokalidad.
Anhi makita ang kamaayong mga laki sa mga local officials pagdala sa renda nga dili kinahanglang masilo ang mga tawo.
Ang pagtimbang-timbang sa desisyon dako kaayo kalainan kun itandi niadtong patara lang pagsunod sa kamandoan gikan sa taas bisan dili kini mosalir diha sa ilang lokal nga kahimtang.
Ning bag-o, daghang mga kaniadto gidili sa IATF ang gitugotan nang makabalik, kini sama sa usa ka metrong distansya sa matag pasahero diha sa mga pasaheroan nga karon mahimo ng usa ka bakanteng bangko ang distansya sa kada pasahero ug daghan pang uban ilabi na kabahin sa mga balay patigayon.
Mahimong ipatuman kini sa tanang lokalidad, apan kinahanglang dunay ikasulti ang LGU kun unsaon kini paghimo pinasubay sa lokal ning kahimtang.
Ang COVID-19 nakapausab sa dagan sa kinabuhi sa tanan mao nga bisan og dili ganahan ang uban pagsunod sa mga protocols, kinahanglan nilang mosunod ang tanan.