Libud-suroy

Niabot og 150 ka tawo apil na ang mga bata nga libud-suroy ang gihipos sa kagamhanan sa dakbayan sa Sugbo gikan sa kadalanan niadtong Biyernes.

Kini agi og pagtuman sa kamandoan sa Department of the Interior and Local Government (DILG) paglimpiyo sa kadalanan taliwa sa nagpadayong pandemiya sa COVID-19.

Ang mga libud-suroy gihakot paingon sa Plaza Independencia diin sila gipaubos sa medical checkup ug profiling aron magiyahan ang dakbayan sa sunod nga lakang nga ilang himuon.

Matud ni Raquel Arce, ang pangulo sa PROBE, ibutang sila sa duha ka half-way house sa dakbayan samtang gihikay ang mga gikinahanglan aron sila makapauli sa ilang tagsa-tagsa ka mga dapit.

Ang mga taga laing probinsiya papaulion samtang ang mga molupyo sa dakbayan sa Sugbo ihatud sa ilang tagsatagsa ka mga barangay.

Apan ang problema, way klarong plano ang dakbayan unsay mahitabo nila human sila mahatud sa ilang mga barangay.

Dili masulbad ang problema kun igo rang ihatud sa dakbayan ngadto sa ilang mga barangay ang mga libud-suroy. Kini tungod kay mobalik lang gihapon ni diha sa kadalanan kun wala silay klarong kapuy-an.

Si Arce miingon nga pasakaan og kaso sa dakbayan kadtong masakpan nila og usab diha sa kadalanan. Ambot gitun-an ba nila og maayo ang problema.

Dili kiha maoy solusyon sa kawad-on nga giatubang sa mga pamilya nga anaa nanimuyo sa kadalanan.

Way gustong magpuyo sa daplin sa karsada, apan tungod sa kalisod napugos ang maong mga pamilya. Inay hulgaon og kaso, angayang mangita og klarong programa ang kagamhanan sa dakbayan unsaon nga matabangan ang maong mga kabus nga makabaton og desenteng pinuy-anan.

Panahon na nga hunongon sa dakbayan ang sugmat-sugmat nilang kampanya batok sa mga libud-suroy ug mangita’g mas maluntarong solusyon sa problema. Pananglitan, magtukod ang dakbayan og tenement alang sa mga way pinuy-anan ug hatagan og trabaho sa dakbayan ang mga libud-suroy sama sa pagpanilhig sa kadalanan ug uban pang trabaho nga ilang mahimo.

Mahimo ni sa dakbayan kun hunongon ang paggamit nga puhonan sa mga trabaho sa gobiyerno sa ilang pamolitika. 

Angkonon man sa atong mga opisyal o dili, apan ang  tinuod daghan sa trabaho sa gobiyerno gihimong pambayad sa utang panahon sa eleksiyon.