Dear Atty. Divine,
Naa mi yuta nga ang nakapangan sa titulo amahan pa sa akong lolo, and then nabahin na og kaupat kay upat man sila ka managsoon sa akong lolo. Ang among gikuptan tax declaration ra timaan nga nabahin na sa upat ang maong property. Ang akong pangutana, pwede ba mi makapa titulo nga mga apo nga maoy mga sumusunod niini? Naay nakapalit sa bahin sa among yuta, pwede ba siya maka patitulo sa iyang portion nga napalit?
Thanks and regards. —Malvin
Dear Malvin,
Yes, kamong mga heirs nga mga apo pwede nga makapatitulo sa inyong mga shares pinaagi sa pag execute og Extrajudicial Partition with Sale sa portion nga pirmahan sa tanang mga heirs. Kinahanglan sa inyong Extrajudicial Partition nakabutang na ngadto kun tagpila ka square meters ang share sa matag usa kaninyo ug kun kinsay gibaligyaan sa portion ug unsay gidak-on sa gibaligya ug inyong ipa-notarized ang maong dokumento. Human niini, inyong i-submit ngadto sa BIR ang maong dokumento alang sa pagbayad og Estate Tax sa inyong lolo nga namatay na nga maoy registered owner. Ang BIR naay list of documents nga dapat ninyong i-submit kanila dungan sa inyong pagpa compute sa Estate Tax so mamahimo kamong mokuha sa list of requirements nga dapat ninyo i-comply sa BIR. Inyo sab nga ipa-survey ug ipa-subdivide basi sa inyong sharing lakip na ang portion nga gibaligya ug kinahanglan nga ipa approved ang subdivision plan ngadto sa DENR. Human sa pagbayad sa Estate Tax ug kun mogawas na ang inyong Certificate Authorizing Registration or CAR, isunod ninyo ang pag-process sa tax Declaration sa Assessor’s Office ug sa Title ngadto sa Register of Deeds. Inig-submit ninyo sa mga documents sa Register of Deeds dapat inyong i-surrender ang original copy sa titulo, lakip na ang approved subdivision plan ug ang tanang dokumento gikan sa BIR aron ma-isyuhan mo og new titles basi sa approved subdivision plan. Thanks and God Bless. —Atty. Divine
Alang sa inyong pangutana, palihug lang sap ag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo