Dihang gihatagan ni Presidente Rodrigo Roa Duterte og absolute pardon ang naprisong US Marine Lance Cpl. Joseph Scott Pemberton, kinsa mipatay ni Jennifer Laude, transgender woman nga iyang gikauban sa usa ka hotel sa Olongapo City, mimugna kinig grabeng pagsaway sa mga netizen, publiko ug labaw na sa pamilyang nagmahal ni Jennifer.
Dili kuno makiangayon ang maong hukom sa pangulo. Dapat, silbihan usa ni Pemberton ang nahabiling katuigan sa gipahamtang sentensiya. Nungkang, buhiag sayo!
Matud pa sa attorney ni Pemberton, nga human makadawat sa absolute pardon notice, gusto gyod sa iyang kliyente nga makigkita sa pamilyang Laude aron mangayog pasaylo. Ang nakalisod, kay wala siyay phone number o bisan e-mail address man lang unta, diin iyang mapadayag-padala ang pagpangayog pasaylo.
Samtang ang abogada sa pamilyang Laude, wala mosagop sa maong pamahayag. Matod niya: “Isa yun sa mga sentyemento, dati pa! Eh, hindi ka man lang humingi ng tawad sa lahat ng mga nagawa mo. If he does apologize, sana totoo. Sana talaga may natutunan siya sa limang taon na pagkakulong niya.”
Kini nagpasabot lang nga dili sila makapasaylo sa nabuhat ni Pemberton. Sanglit, maoy mipasulabi sa ilang galamhan ang pagdumot-panimalos.
Nalimot sila nga si Jennifer nagpakababaye bisag ang tinuoray, usa kini ka lalaki. Rason, nganong napatay kini ni Pemberton, kinsa nasuko human masayod nga pekeng babaye diay ang gikakuyog ug dili dyenwen. Tinuoray, nakahimog dakong sala si Pemberton. Si Jennifer, wala ba?
Angay natong hinumdoman. Kadtong usa ka makasasalang babayeng gihukman sa mga Pariseo ug magtutudlo sa balaod nga patyon pinaagi sa pagbato. Diin, sa wala pa makasugod, silang tanan giingnan ni Hesus:“
Kadtong walay sala, maoy unang mobato!”
Ug nag-iyahayg talikod-panglakaw ang tanan, binilin ang babayeng nagtindog sa atubangan ni Hesus, kinsa gisultian: “Wala ka ba nila siloti? Ako, dili sab mosilot nimo. Hala, lakaw ug ayaw na pagpakasala.”
Matud pa sa Mat 16:25-26, “Pasayloa ang inyong gikayugtan aron ang Diyosnong Amahan mopasaylo sab sa inyong kasal-anan. Kon dili mo mopasaylo, dili pod mo pasayloon sa Langitnong Amahan.” Nga sa ato pa, ang pagpasayloay diay sa atong mga sala, kanato makapaha-Langit. Unta, hisabtan ug sagopon kini sa wala makasabot sa gibuhat ni Tatay Digong.