Nalipay ko kay kadaghanan sa katawhan dinhi sa Dakbayan sa Sugbo miuyon nga sirad-an ang mga menteryo ug dili pasudlan sa mga tawo atol sa All Saints’ Day ug All Souls’ Day.
Ang tumong pagsirado sa menteryo aron nga malikayan ang pagtinakdanay sa coronavirus disease, kay dili man gyud kalikayan nga magdikitay ang mga tawo diha sa menteryo.
Dunay pipila ka tawo miingon nga kuhaan man kuno og temperature ang mga mosulod sa menteryo ug kadtong gihilantan dili pasudlon. Pastilan, wa tingali sila makadungog sa gitawag og mga “asymptomatic.”
Kining mga tawhana positibo sa COVID-19 apan way mga timailhan kay wa sila hilanti, wa ubha ug wa sip-ona. Sa ato pa, makasulod ra ang mga tawo nga mga asymptomatic?
Diha sa mga menteryo, ang mga nitso nagpatong—patong og upat ka patong. Kay ang mga pamilya sa maong mga gilubong diha manuaw man gyud, magdikitay gyud sila, kay kon dili, tua na sila sa layo?
Ang pagbisita sa mga lubong sa atong mga mitaliwan na nga minahal sa kinabuhi, mahimong himoon nato karong mga adlawa, nga dili gyud itumong sa All Saints’ ug All Souls’ Days.
Pagkakaron, nagkamenos na ang gidaghanon sa mga natakboyan sa COVID-19, apil na dinhi sa Dakbayan sa Sugbo, ug dili nato tugotan nga mobalik na sab unya pagsaka ang mga kaso sa coronavirus.
Husto si Mayor Edgar Labella nga misuporta sa tinguha sa Inter-Agency Task Force (IATF) ug mipahibalo nga dinhi sa siyudad, ang mga menteryo sirad-an gikan sa Oktubre 30, 31, Nobiyembre 1, 2 ug 3.
* * *
Karong buwana, daghan unta nga kalihokan ang mga sakop sa media dinhi sa Cebu. Ang mga broadcaster sa TV ug radio stations magsaulog karong buwana sa Broadcaster’s Month.
Unya, sa ikaupat nga semana karong buwana, saulogon sab unta ang Press Freedom Week gikan sa Septiyembre 20 ngadto sa Septiyembre 26. Ang Freedom Week itumong gyud sa semana nga masulod ang Septiyembre 21 nga sumad sa pagdeklarar sa Martial Law.
Apan tungod sa coronavirus pandemic, mingaw ug way mga kalihokan ang mga sakop sa media dinhi sa Sugbo. Alegre unta kaayo kay mao ra kini ang higayon nga ang mga sakop sa media magkatagbo.
Nakasabot ko nga tungod kay anaa pa man gud ang COVID-19 mao nga likayan lang usa ang pagtapoktapok sa mga sakop sa media. Unsaon man nga naabtan man gyud ta niining mao nga pandemic.
Balikon nako ang paghangyo sa katawhan nga kon dili kaayo importante ang paggawas ninyo sa kabalayan, standby lang mo sa inyong mga balay, sama sa akong kanunay’ng gihimo.