Tanan apektado karon sa nasinating pandemic niining coronavirus. Apan naa gyuy sektor nga mas or grabeng naapektohan sama sa mga nangawad-an og trabaho kay nanira ang ilang kompaniya.
Lakip na ang mga nanarbaho sa hotel industry ug ang mga seaman kansang barko wala na makabiyahe o ang mga nagtrabaho sa eroplano nga wala na makalupad.
Inay maghuwat nga makabalik og operate ang ilang trabahoan, naay mga tawo nga naningkamot sa pag-shift sa ilang panginabuhi aron dili maabtan sa tumang kalisod.
Sama niining batan-on nga seaman nga si Kerby “Don” Camacho nga murag 360 degrees ang pagtuyok sa iyang kalibutan dihang na freeze ang ilang operation.
Siya ang gisaligan sa iyang pamilya kay mga tiguwang na sad iyang iyang mga ginikanan ug ang iyang amahan na-stroke pa.
Imbis magpaanod siya sa sulog sa kawalay paglaum, naningkamot siyang makalangoy aron mabuhi ug makapadayon sa iyang mga damgo.
Nagnegosyo siya og homemade sweet and spicy hipon diin siya ra ang nagluto, trial and error nga iyang gipatilaw og una sa iyang pamilya ug sa mga silingan.
Dihang nakuha na niya ang timpla iya na kining gipamaligya sa online portal ug nipatok ang lami sa mga nakatilaw.
Ang mga tawo nga gusto pud mokita sa ilang hipon nag reseller sa ilang produkto hangtod nga nagkadaghan na ang ilang suki.
Gani nag mass produce na sila sa ilang produkto nga nakahatag pud og trabaho sa iyang mga igsoon nga maoy katambayayong sa iyang tingusbawan.
Ang paningkamot sa bag-ong negosyante giabagan sa babayeng inspirasyon sa iyang kinabuhi nga si Marille Palaubsanon nga maoy bahala sa marketing.
Kong unsa ka hilomon ug mauwawon ang lalaki, mao pud ka tabian o ma PR ang babaye nga nagamit sa ilang business.
Uwan init ang gisagubang nilang duha panahon nga mag-deliver sa ilang produkto tungod kay gusto nilang hands on gyud ang ilang pag atiman sa ilang panginabuhian.
Sekreto niining mga batan-ong nanginabuhi ang kakugi aron maabot nila ang ilang tingusbawan.
Start small apan dream big ang ilang gihuptan, dili pa man sila big time apan positibo sila sa ilang goal nga matuman ang ilang gidamgo sa kinabuhi.
Nagpakita lang kini nga dili makababag ang kagaw sa kaisog sa determinasyon sa mga tawo aron mabuhi.