Good Samaritans
JAV BANATI - Javier Yntig Tapulado (Banat) - August 24, 2020 - 12:00am

Ning panahon sa kalisod, makita ang tinuorayng kinaiya sa tawo.

Kinsa ang nakaila’g Ginoo ug kinsa ang mga hinanib sa demonyo?

Sa social media gipangladlad ang nagkadaiyang buhat sa mga tarong ug usab sa mga dautan.

Ang mga tarong makatandog sa kasingkasing. Ang mga dautan makapakagot sa bag-ang.

Aniay pipila ka maayong buhat nga nasugatan ko sa Facebook: 1) May nagkotseng mihunong tungod sa tigulang nga namaligyag utanon.

Pagkahibalo sa mihunong nga napugos ang tigulang sa pagpaninda aron makapalit og bugas ug mga medisinang gimintin, tanang tinda niini gihurot pagpalit sa babaye. Gitunolan pag-additional P5,000 ang tigulang.

2) Usa ka lola, namaligyag lagutmon sa sidewalk. Wala mag-facemask. Giduol sa polis.

Apan wala dakpa. Hinuon, gipalit ang tanang tinda, gihatagag bag-ong facemask ug gipabawnan pag kuwarta dungan ang pagpagawas og warning nga dili na usbon sa tigulang ang kalapasang nahimo ning kuwarantina. Dayon, gipapauli siya sa polis.

Niining bag-o, grupo sa mga motorcycle riders, Squad 032 ug TCH Riders, nagkahiusa aron paghatag og hinabang sa usa ka pobre kaayong mekaniko, Romeo Oyao Jr., kinsa bag-o lang gibiyaan sa namatayng asawa nga nagbilin og unom nila ka anak, diin duha managkaluha ug masuso pa.

Daw kamalig sa baka ang gipuy-an sa iyang pamilya nga igo rang giaptag tolda.

Makaluluoyng kahimtang nga nakatandog sa manggiluy-ong kasingkasing sa nahisgotang mga motorcycle riders, kinsa nagkahiusa sa pagpabarog og bag-ong balay alang kang Oyao, diin ning higayona semento ug sin na ang gipangdapat.

Tag-iya sa SMB Tourist Transport, Mark Anthony Boyo, kinsa usa usab ka motorcycle rider, mibuhos sa daw walay kinutoban niyang tabang.

Mihatag og usa sakong bugas, milukat sa na-expired nang rehistro sa motorsiklo ni Oyao. Unya mitanyag pag trabaho sa walay trabahong mekaniko.

Hasta si CCMC Hospital Administrator, Kap. Yvonne Cania, natakdan sa mga motorcycle riders.

Nadasig sab pagtunol sa iyang tabang ngadto sa pamilyang Oyao kutob sa unsay iyang mahimo.

Walay kalainan ang ilang gibuhat niadtong Samaritanyo, kinsa dihang nakaagig usa ka paganong samdan nga naglubog sa dalan, iyang gipasakay sa kamelyo, gipatambalan ug mao pa gyoy miabaga sa tanang galastohan hangtod naayo kini.

Unta, tanang lider sa atong nasud mahisama kanila. Please, help stop corruption!

GOOD SAMARITANS
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with