Segun sa advisory nga gipatik sa Facebook page sa Chinese embassy, kadto lamang mga Pilipino nga negatibo sa COVID-19 pinaagi sa pagpaubos sa nuceic acid test, ang tugotan nga makabiyahe sa China. Ni’ng pagka-dehado sa Pilipinas, makahimo ba kaha ang atong pamunoan og samang lakang batok sa mga Intsik? Makapahinumdom kanako sa akong amigo nga wala pasudla sa iyang asawa sa ilang balay kay hubog ug kaadlawon na nipauli. Agi’g bawos, iya usab gitrangkahan ang pultahan sa ilang balay dayon ingon, “Kon dili ko ninyo pasudlon, aw, dili sad mo nako pagawson”. Pagkatoytoy!
LAND OF COVID-19!
Mihangyo si Sec. Roque sa mga Pilipino sa pagsabot na lang sa napatik sa mantalaan sa Thailand diin gitawag ang Pilipinas nga “Land of COVID-19” kay kuno ang maong panglantaw kabahin lamang sa “free speech”. Nilikoy man si Secretary Roque. Dili na lang gyud moangkon nga gisaway ang kahimtang sa pandemic sa atong nasud nga nagka-grabe tungod sa kapalpakan sa nagdumala. Ginaingon baya nga, “Daghan ang makat-onan kon angkonon ang sayop kay sa ilimod kini…kay ang dili pag-angkon sa sayop, maoy laing dakong sayop”. Limod pa more!
LAGDA NGA BALIGHÔ
Mipagawas ang Malacañang og bag-ong workplace protocols diin usa niini mao ang pagdili sa mga trabahante pagkaon diha sa ilang mga canteen aron malikayan ang pagkuyanap sa coronavirus. Ang katuyoan sa canteen mao nga kan-anan kini sa mga trabahante. Kon dili na itugot ang pag-kaon sa maong dapit, unsa na man lang ang itawag sa maong dapit- KWARENTINA na ba inay KANTINA? Haay kining COVID, dili lamang ang atong pagkinabuhi ang nausab, hasta usab ang kahulogan, katuyoan ug lintonganay sa mga pulong. ECQ pa more!
MGA LINTA SA PHILHEALTH
Human sa nahitabo nga pag-ulbo sa usa ka bodega didto sa pantalan sa Beirut nga mikalas ug daghang kinabuhi nga nakaaghat og halapad nga protesta, mipahibawo si Lebanon Prime Minister Hassab Diab nga moluwat na siya sa iyang katungdanan. Dinhi sa Pilipinas, bisan taliwala sa makabungog nga reklamo ug panunglo sa katawhan, pabilin nga mikuwabid sa ilang pwesto ang mga opisyales sa PhilHealth nga daw linta nga nagsige’g suyop sa dugo sa iyang biktima. Matud pa sa pagya, “There’s more FUND in the Philippines”. Fezteleern!
KUSOG PA’Y BA-Ó
Reklamo karon sa mga ginikanan mao ang kahinay sa internet nga mao unya ang dugukan sa pamaagi sa pagpahigayon sa klase nga giduso gayod sa DepEd. Dakong pangutana pa karon ang ka-epektibo sa pagpahigayon sa vitual/online classes. Tu-aw pa sa akong silingan, “Bugo man gani akong anak nga naa gyud sa iyang atubangan ang magtutudlo, samot na karon nga tua ra sa layo. Pun-an pa’s internet nga kusog pa’y ba-ó, di na gyud tingale makat-on”. Hala no