Usa ka dakong hagit sa Department of Education (DepEd) ingon man sa Commission on Higher Education (CHED) kaning distance learning sa mga tinun-ang Pilipino nga maoy gipasunod tungod sa hulga sa COVID-19 pandemic sa nasud karon. Dakong hagit tungod kay dili tanang pamilya may access sa internet ug kun duna man, dili sigurado kun kasaligan ba ang ilang linya tungod kay mag-agad kini sa lugar diin magpuyo ang mga bata.
Ang DepEd naghimo og survey sa mga tinun-an ug mga ginikanan sa klase sa distance learning nga ilang makaya. Nasuta nga mas daghan ang gusto og modular or printed mga pamaagi kun itandi sa online-based learning.
Giingon nga 8.8 milyones ka ginikanan ang mas gusto ang modular learning kun diin ang mga tinun-an magtuon pinaagi sa mga printed materials nga kuhaon o ipadala diha sa ilang balay aron ilang tun-an.
Samtang 3.3 milyones lang ang gusto nga ipaagi sa online ang pamaagi. Dunay uban nga sagol ang gipili, online ug modular, samtang dunay TV-based ug radio-based.
Duna man tuod smartphones o ordinaryong cellphones ang uban, apan daghan sa mga ginikanan ug bisan ang mga bata dili kasalig niini.
Makita dinhi kun unsa ka biya sa teknolohiya sa komunikasyon ang nasud kun itandi sa ubang kanasuran sa Asya. Gawas nga maoy kinahinayan nga internet, mao sab kini kinamahalan tibuok Asya.
Kung ang tumong sa DepEd makat-on gihapon ang mga tinun-an sa ilang mga leksyon bisan pa pinaagi sa distance learning, mas labing maayong himuon kini sa pamaagi mas daghan ang makabuhat ug dili ipamugos ang dili pa makaya sa kinabag-an.
Tungod dili naman matutokan tagsa-tagsa sa mga magtutudlo ang mga bata kinahanglang kadtong mga learning materials nga ilang patun-an dali rang masabtan.
Angay ikonsiderar sa DepEd ang kabutang sa mga bata, kun ang ginikanan may panahon ba makalingkod pagtudlo sa ilang mga anak, tungod kay basin nanginabuhi o unsa pang rason. Duna say uban nga mismo ang mga ginikanan dili kasabot sa leksyon sa ilang mga anak, unsaon naman lang pagkat-on sa mga bata?