Katin-awan sa mayor

Hain ba nga mga dapita dinhi sa Dakbayan sa Sugbo nga wa pa mahatagi og bugas ang mga lumolupyo? Nindot nga balita kay gitataw ni Mayor Edgardo Abella nga nagpadayon pa ang pagpanghatag og mga bugas sa kabarangayan.

Nagsultihanay mi si Mayor Labella kaniadtong Martes dihang miadto ko sa Cebu City Hall kay midonar og daghang bugas si Senador Sherwin Gatchalian, nga nagpadayon pa diay ang pagpanghatag og bugas sa kabarangayan.

Naklaro na gyud nga wala lang mamaayo sa pagkasuwat sa sakop ni Mayor Labella kadtong gi-post sa Facebook nga maoy gikuhaan og report sa mga sakop sa media. Gibutang man gud dito nga kompleto na ang pagpanghatag og bugas.

Ang gipasabot diay mao nga ang City Hall nakakompleto na sa pagpanghatod sa mga bugas ngadto sa mga barangay, aron nga ang gitugyanan sa pagpanghatag sa maong mga bugas ngadto sa katawhan, makasugod na sa ilang gimbuhaton.

Mao nga gikontak nako ang mga tinugyanan sa Mayor’s Information Liaison Office (MILO) sa Barangay Apas, ug nahibaw-an nako nga nagpadayon pa sila sa pagpanghatag.

Buyno, malipay kita nga ingon diay niini ang sitwasyon kay kon basahon gud nimo ang balita nga gipublikar sa Facebook sa mayor, masabot nga nakompleto na kuno ang pagpanghatag kay ang termino nga gigamit completed” man.

Daghan ang nasagmuyo kay wa man nila ayoha pagpasabot nga ang nakompleto mao ang paghatud og mga bugas ngadto sa barangay, ug ang barangay magpadayon na sa pagpanghatag para sa katawhan.

* * *

Pastilan, hangtod kaniadtong Martes, miabot na og 388 ang gidaghanon sa mga tawo nga giingong nangamatay tungod sa coronavirus dinhi sa siyudad sa Sugbo.

Kon imong tan-awon sa figure, mora’g makulbaan ta kon i-downgrade ang category sa quarantine dinhi sa ato kay sigurado man gyud nga mokiat na sab ang mga tawo, ilabi na diha sa mga slum areas.

Tan-awa ra gud kadtong nahitabo diha sa Alaska-Mambaling nga paglibkas gyud sa lockdown sa ilang lugar, aw daghan kaayong mga tawo nga nagpasabong og mga manok daplin sa dagat, ug ang uban nangaligo nga wa na magsul-ob og mask.

Pagkaugma, aw pwerteng daghana nga gipangdakop ang mga sakop sa SAF kay nakalapas man sila sa quarantine policy.

* * *

Para nako, nindot sab nga mo-downgrade na lang ta ngadto sa MECQ o kaha GCQ aron nga makabalik na sa pagtrabaho ang daghang mga trabahador, kay lisud na tawon kaayo ang ilang kahimtang.

Pero mao lagi, sigurado ko nga daghan gyud ang masakripisyo kay wa man sila’y masakyan, ang mga motor dili man paangkasan, sa ato pa maglakaw mo?