Alburoto sa anti-terror law
Ambot pa nganong daghan dinhi sa nasud ang nahadlok, nataranta ug nag-alburoto batok niining bag-o ug hilabihan ka kontrobersiya nga balaud batok sa terorismo nga gipirmahan ni Presidente Rodrigo Duterte sa niaging semana.
Kon ang usa ka matinumanon nga lumolupyo sa nasud walay dautang tumong nga seryosong makakumprimiso sa kahusay og kalinaw sa estado, wala man siguro siyay igong ikahadlok niining pagpatuman sa Anti-Terrorism Law.
Sa niaging mga adlaw, daghan ang nagpanon ngadto sa hawanan sa Korte Suprema aron pagkwestiyon sa maong bag-ong balaud. Sila mialegar nga dako kini og tsansa nga makalapas unya sa tawhanong katungod sa katawhan.
Sa niaging Biyernes, usa ka grupo sa mga abogado gikan sa inila nga mga unibersidad didto sa kaulohan ang midangop sa Labaw nga Hukmanan ug nangayo og temporary restraining order o TRO batok sa Anti-Terrorism Law.
Matud pa nila, adunay mga probisyon sa maong balaud nga hulga kuno sa ka gawasnon sa mga Pilipino. Kini ang hinungdan ngano nga nangayo usab sila sa Korte Suprema og Writ of Preliminary Injunction batok sa maong balaud.
Wala usab nagpalupig ang mga magbabalaud sa oposisyon sa Ubos Balay Balauranan pagpaghot sa maong balaud. Kaniadtong Lunes, midangop usab sila ngadto sa Korte Suprema aron pagkwestiyon sa legalidad sa Anti-Terrorism Act of 2020.
Si Kongresista Edcel Lagman sa Albay ug mga magbabalaud ilalum sa Makabayan bloc mideklara ngadto sa Labaw nga Hukmanan nga usa ka unconstitutional ang maong balaud tungod sa pipila ka probisyon niini nga wala kunoy klaro.
Hinuon, sa laing bahin, ila usab nga katungod ang pagkwestiyon sa Anti-Terrorism Law kon sa ilang tan-aw adunay dako kini nga tsansa nga makalapas sa tawhanong katungod. Ila usab kana nga interpretasyon sa maong balaud.
Mao ni ang nakanindot sa klima sa demokrasya nga atong gisagop. Gumikan lagi sa atong pagkagawasnon, makahimo kita sa pagpagawas sa unsa mang atong yangungo batok sa atong nakita nga kahiwian sa kagamhanan.
Anaa na ang bola sa hawanan sa Korte Suprema. Ug modesider na unya ang Labaw nga Hukmanan sa merito sa maong mga petisyon batok sa maong balaud. Legal ba ang maong balaud? Kana maoy ato unya nga masayran.
- Latest