Tuob

Pait kon sa pamilya adunay masakit.  Labi na’g kabos. Makawot gyod ang dili katol. Kay maglisod man gani’g palit sa inadlawng panginahanglan, unsa na kaha ang para ibayad sa doktor?

Dihang among silingan, gihilantag tulo ka adlaw kay napasmo, unya nagkurog na, naglumba dayon ang mga silingan pagduol aron sa pagtabang. May nag-init og tubig, nagkuhag habol ug naay miandam og plangganita.

Bisa’g elementariya pa ko niadtong panahona, dili gyod ko malimot unsay ilang gibuhat? Unsaon, nakuyog man kong Nanay nga miadto didto.

Busa, nasaksihan nako ang asin nga gilunod ngadto sa nagbukal nga tubig sa kaldero, diin dihay mga dahon gisagol. Unya taudtaod, gihaon ang kaldero, gihuwad ang tanang sulod ngadto sa plangganita ug gidala sa nahimutangan sa gihilantan.  Unya, gituoban kinig habol.

Hasta akong anhing Tatay ug Nanay migamit sab ining paagiha – tuob. Kay mao ray madalidali namong pobre. Pero, epektibo!

Ning kuyaw’ng kahimtang nga giatubang nato karon, diin wala pay klarong medisina nga hingpit makapukan sa COVID-19 ug binilyon na ka pesos ang nagasto sa kagamhanan, gidasig ni Cebu Gov. Gwen Garcia ang katawhan sa pagdangop sa ‘tuob’ agi’g proteksiyon o pagpakig-away batok ning atong kontrang tanggulilong.

Kay didto sa Amerika ug ubang gawas sa atong nasod, daghan nang testimoniya gikan mismo sa mga nataptag COVID-19, ang nangaalim tungod sa ‘tuob.’ Mga Filipino frontliners didto, nagsige pog tuob!

Apan mianig pagsaway sa pipila ka doktor kining diyosnon ug maayong tumong sa gobernadora.

Pagsaway nga misangko hinuon sa panagsukliayg hait nga mga pulong ning panahon nga dapat kitang tanan magkahiusa pagsunod sa sugo sa atong Ginoo nga mao, ang paghigugmaay sa usag-usa.

Nindot hinumdoman. Kita lumalabay lamang. Kon ang lawas nagkinahanglag ‘tuob’ aron maluwas, samot na atong kalag.

Haiy maayo, kon usag-usa nato, mosulod sa tinak-opang lawak nga mag-inusara ug tuobon sab ang masakiton natong kalag pinaagi sa paghinulsul sa tanan tang sala, mangayog pasaylo sa Ginoo ug dili na gayod magpakasala. Meaning, nga bisag ilansang pa kita sa krus tungod kay gipalansang ta sa gusto natong luwason sa kamatayon, gugma lang gihapon ang atong ibalos.

Kon kini atong mahimo, panington sab atong kalag ug mahuwasan. Unya, di na gyod ta mahadlok sa COVID-19.