Ingnon ko lang nga nahuman na sa pagsumiter sa ilang kuwentada sa social amelioration cash ang mga opisyal sa barangay bisan duna pay pipila ka Kapitan ang wala pa makasumiter sa ilang kuwentada kay gamay naman lang pod ni sila.
Nahuman na ang SAP pero ang mga kasakit nga natagamtaman sa mga opisyal sa gobyerno tungod sa pag pang-insulto ug mga pagpakauwaw nga gibato sa mga tawo nga diskumpiyado batok kanila nagpadayon.
Way laing gikatampo ang SAP kun dili mga kasakit ilabi na sa mga opisyal sa barangay nga relihiyosong naghimo sa ilang trabaho ug wala magtinonto.
Tungod sa SAP wa makalingkawas sa mga pagsaway ug pagpakauwaw nga gihimo sa mga tawo nga nadiskumpiyado ug nagreklamo ang mga opisyal sa gobyerno, gikan sa Presidente hangtod na sa mga opisyal sa barangay tungod kay wala makaapil sa pagdawat sa SAP.
Gawas niini, hapit na usab moabot sa duha ka gatos ka mga opisyal sa barangay ang gipasakaan og kaso lukop nasud.
Dili ikalimod nga aduna gayod mga opisyal sa gobyerno ilabi na sa barangay ang nagpabadlong ug nagkinolokoy sa ilang trabaho maong angayan lang sawayon. Apan ang pagsaway dili makiangayon sa mga opisyal nga nagtinarong.
Ang pagpanaway maayo kun aduna kini basihanan tungod kay kabahin ug esensiya kini sa demokrasya. Ang pagpanaway suportado sa balaud kay kabahin kini sa kagawasan sa tawo sa pagpadayag. Apan ang pagpanaway angayang ikauwaw kun gihimo kini sa mga tawong iresponsable.
Ang pagtawag sa mga opisyal sa barangay sa bisan unsang matang sa pulong dili problema. Pero ang pagtawag niyang kawatan ug kurakot basi lamang sa narehistro sa iyang utok ug dili sa ebidensiya ug hukom sa hukmanan usa ka libelo busa kinahanglan siyang silotan ug ibalhog sa prisohan tungod sa iyang pagka-iresponsable.
Kinahanglan siyang mauwaw sa iyang gihimo.