Dili lang ang panglawas maoy target sa coronavirus kondili apil na ang atong tibuok nga pagkatawo, ang relasyon nato sa atong isig ka tawo nga inanay’ng giguba tungod sa atong kahadlok.
Imbis kaluoy ang ipakita sa atong isig ka tawo, pagtamihid ug pagpanghimaraot gani ang gihimo sa uban.
Makasabot man kita nga ang tanan maglikay nga matakdan sa virus maong maglikay gyud ni bisan kinsa karong panahona.
Apan naay uban nga nasobrahan ra nga ang ilang pagtan-aw sa mga nataptan sa sakit basura nga kinahanglan ilabay o sunogon nalang aron dili na makapanakod pa.
Tinuod nga unang higayon nato kining nasinati ug wala pay tambal niini apan mas delikado ang batasan karon sa atong isig ka tawo.
Ang kanhi silingan nimo nga suod kaayo ang mounay sa paglansang nimo sa krus bisan og ikaw suspected pa lang o ba kaha usa ka frontliner.
Pait kaayo palandungon nga sa gihimo sa uban nawagtang ang paghatag og bili sa pagkatawo dili sa mga nataptan pero sa mga tawo nga naghimo sa ingon.
Angayan nato hunahunaon nga walay bisan kinsa nga tawong dili mataptan sa kagaw kon dili mag amping.
Busa gikinahanglan natong mag-amping apan seguradohong dili usab makapasakit sa atong isig ka tawo.
Sa gipamulong ni Gov. Gwen Garcia, dili ingon niini ka deadly ang virus nga mihugpa sa nasud kay kon atong tan-awon gamay ra man kaayo ang mortality rate.
Sama sa ubang sakit nga naunang mihugpa ug padayon nga naa karon sama sa dengue naay naluwas ug naa usay mga nakalas.
Adunay mga pamaagi nga makalikay kita sa virus o mapilde kini sama sa gihimo sa mga COVID-19 asymptomatic sa Barangay Luz nga nangaayo tungod sa mga alternatibong pamaagi nga gihimo nila.
Tuob, zumba ug pag-ampo labaw sa tanan busa dili kita magpadala sa atong kahadlok nga maoy mopatigbabaw ug moulipon kanato.
Sa tinuod lang ang kahadlok maoy numero uno natong kontra niining panahon sa pandemiya.
Buhian nato ang atong hunahuna ug pagbati inubanan sa positibong panglantaw nga makalingkawas kita niining pagsuway karon.
Ang mga coronavirus survivor sa Sugbo maoy buhing testimonya nga mahimong maka-survive ang tawo kon aduna kiniy dakong pagsalig sa kaugalingon ug sa Labawng
Makagagahum.