Gawas sa P50 milyones nga quarantine facility diha sa SRP, laing tinguhang tukuron sa dakbayan mao ang P240 milyones nga kantidad sa command center diha sa Natalio Bacalso Avenue duol sa Cebu City Medical Center.
Ang walo ka andana nga edipisyo mao kunoy magsilbing command center sa traffic, disaster response, health ug uban pa.
Ang pundo alang sa maong proyekto nasukip ni sa Supplemental Budget No. 3 nga gisubmitir ni Mayor Edgardo Labella sa konseho niadtong miaging semana.
Gitakda unta kining tukion sa konseho atol sa ilang special session niadtong Biyernes apan wala na madiskutir tungod sa kaapiki sa panahon.
Ang command center usa sa mga saad ni Labella panahon sa kampanya.
Apan unsa ba gyud ka mahinungdanon ang maong proyekto? Kinahanglan ba gyud nga ingon niini ka dako ang pundo nga gastohon alang sa usa ka command center?
Nganong magkinahanglan og walo ka andana nga bag-ong building ang dakbayan alang sa usa ka command center?
Dili ba kini usa ka pag-usik usik sa pundo sa gobyerno? Maayo tingali nga inay magtukod og bag-ong building ang dakbayan aron himoong command center, ilang gamiton ang pundo aron mahuman ang gikinahanglan kaayo nga tambalanan sa dakbayan niining panahon sa pandemic.
Mas may kapuslanan kun himoong prayoridad sa mga opisyal sa dakbayan ang pagpahuman sa CCMC.
Kun nagkinahanglan gyud og luna alang sa command center, dili ba mahimo nga gahinan og usa ka dakong lawak diha sa CCMC alang niini?
Niining panahon sa krisis nga daghan ang nagsalig og tabang gikan sa kagamhanan, angayang klarohon sa dakbayan ang mga prioridad niini. Angayang hinunduman sa mga opisyal sa dakbayan nga ang matagpiso nga ilang usikan singot ug dugo ang puhonan niini sa mga magbubuhis.
Gawas sa pagpahuman sa CCMC duna pay laing mas mahinungdanong proyekto nga angayang unahon sa dakbayan inay ang pagpatukod og command center.
Pananglitan ang pagpalambo sa drainage system sa dakbayan aron masulbad na ang grabing pagbaha sa kadalanan.