Tanang kanasuran naningkamot ug nagtinguhang makabalik og bangon ang ilang ekonomiya human sa pila na ka bulan nga nihunong ang negosyo ug mga kalihokan sa ilang katawhan tungod sa novel coronavirus (COVID-19).
Dinhi sa Pilipinas, daghan ng mga probinsya ang gipaubos nalang sa general community quarantine. Usa ra ang gikinahanglan, gamay ra sila og mga kaso sa virus ug may kapabilidad silang atimanon ang maong mga pasyente.
Samtang maayo tuod nga mabalik pagdagan ang ekonomiya, nagpabilin ang kabalaka sa mga tawo sa maong sakit.
Ang mga dagko ug gagmay’ng negosyante dako na og alkanse. Gani, ang uban kanila nanirado gyud tungod kay wa na silay gikita human wa nay mga tawong mamalit o nagkinahanglan sa ilang serbisyo.
Nag-unang nakulban sa kaldero ang mga small-medium enterprises nga atol sa enhanced community quarantine naputol ang ilang operasyon.
Mabalik man tuod og pangabli kining maong mga negosyo, apan dili kini garantiya nga makapabangon dayon sa ekonomiya karong tuiga.
Samtang wa pay bakuna nga madiskubrehan batok sa maong sakit magpabilin ang kahadlok sa publiko nga mogawas sa ilang mga balay sama kaniadto.
Kung mopatuo lang ang katawhan sa simpleng “stay at home” nga protokol, may purohang mapakgang ang pagkatap pa sa virus.
Magmatngon unta ang publiko aron wa nay mahitabong second wave sa virus sama sa nahitabo sa Japan ug Singapore.