Nindot kaayo paminawon nga ang gugma pagaisipon natong desisyon. Desisyon tungod kay kini mao man ang hinungdan nga bisan pa man kun ugaling bation og kalas-ay ang hingtungdan padayon gihapon niyang higugmaon ang si bisan kinsa o ang bisan unsa nga kabahin sa iyang kinabuhi.
Kini tungod kay ang maong buhat desisyon man. Busa angayan lamang tingali nga kini usab ang atong paharion ning panahon sa krisis. Gitawag kini og selfish at the same time selfless.
Selfish? Nganong selfish o hakog man kini? Kini tungod kay una sa tanan dili kita buot nga matakdan sa maong sakit mao nga naningkamot kita sa gitawag natong social distancing.
Kay basin kita mismo mamahimong carrier sa maong sakit ug makatakud kita sa uban. Kay unsaon man nato tuod pag-atiman sa uban kun kita mismo angayang atimanon dili ba?
Walay klase apan wala kini magpasabot nga magpunay na lang sab og laag ang mga estudyante. Gituyo tingali og lockdown aron kuno makauyab og silingan apan kun mahitabo man gani na awh long distance una?
Selfless? Tungod kay ang imong gihimo nga paglikay gikan sa kadaghanan usa man ka paagi sa pagpanalipod sa kinabag-ang kaayohan. Gihimo nimo kini tungod kay ikaw mismo buot man nga mamahimong luwas ang tanan.
Busa ang gihimong paglikay usa usab ka halad sa gugma. Kini tungod kay dili lalim ang mosakripisyo physically aron pakigbatukan ang dili makitang kaaway nga mao ang COVID-19.
Lisud kining maong kaaway kay kun buot hunahunaon iyang natandog ang nagkadaiyang aspeto sa atong kinabuhi. Espirituhanon, Ekonomiya, Politika, Seguridad, Pamilya ug uban pa.
Kun dili kini nato mabuntog sa mas hinanaling paagi nan, kitang tanan mabutang gyud sa dakong kakuyaw….. busa kinahanglang mohimo kita og mahinungdanong desisyon, ug kini ang paghatag usab sa atong tampo aron pakigbatokan kini.
Desisyon nga nagasukad gikan sa gugma nga mahimong selfish apan diay selfless.