Libaong diri, lungag didto. Mao kini ang makaguol ug makasagmuyo kaayong estado sa pipila ka mga dalan sa Metro Cebu nga kondili makaguba og sakyanan, makapatay gyud og motorista.
Pipila aning mga lungag ug libaong sa karsada resulta na sa kadugayon nga wala maatiman sa mga lokal nga kagamhanan o nasudnong ahensya sama sa Department of Public Works and Highways (DPWH).
Duna puy uban nga libaong mugna sa pipila ka mga kontraktor sa mga pribadong kompanya o bisan sa mga proyekto sa DPWH nga nagkulang sa pagbutang og mga safety measures alang sa kaluwasan sa mga motorista ug sa mga makaagi sa ilang proyekto.
Sama sa pagtupong sa sinumpayan sa bag-ong gisementong karsada ug sa daan, kay dunay uban nga mas habog ang pikas hinungdan nga mountol gyud ang sakyanan ug kuyaw makadisgrasya na hinuon.
Unta tan-awon sa DPWH kining maong mga nakompletong proyekto kun gitarong ba pagbuhat sa kontraktor ug lakip na adtong mga padayon pang gitrabaho para sa kaluwasan sa mga motorista.
Gawas sa DPWH, dunay mga dagkong pribadong kompanya sab ang dunay mga “road works” pag-upgrade sa ilang mga pasilidad, apan bisan sila wala sab makabadlong sa ilang mga kontraktor nga nagpabaya sa wala pay aksidenteng nahitabo.
Niadto lang nakalabay nga gabii, usa ka lalaking nagmotor ang nabalitok diha sa Basak, Mandaue City tungod sa giayo nga leak sa linya sa tubig.
Daghang mga netizens ang nakasaway sa hitabo. Asa man diay gibutang ang mga early warning devices ug mga safety measures? Maayo man kining mga proyektoha kay daghan man ang makabenepisyo, apan siguraduhon unta nga luwas ang mga motorista kay inay kalamboan, kamatayon hinuon sa uban ang dangatan.