Akong nakita ang bili diha sa pakighugoy hugoy sa katawhan. Kini tungod kay ang paghugoy hugoy dako man og kahimoan aron mas mapalig-on nimo ang imong relasyon ngadto nila labina kun sila sakop sa imong pagdumala ug pangalagad.
Apan dunay mga higayon diin atong himoon ang pagdumili sa usa ka pagdapit dili tungod kay dili ka buot sa ilang giandam o sa ilang presensiya apan tungod kay sugo sa imong panglawas dunay mga pagkaon nga angayan nimong balibaran ug sugo usab sa tinguha nga makagahin ka og igong panahon angayan lamang nga mopokus ka lamang sa panimalay nga sa imong presensiya nangindahay.
Mao nga wala ang gyud kaayo magdugay. Dunay edarang babaye nga kanako nipaduol bisan pa man sa sungkod ug sa lakaw nga nag-aginod siya niduol kanako aron makighimamat. Si kinsa ba gud akong mobalibad sa maong hangyo sa usa ka tiguwang? Ang iyang dakong tinguha nga moamin bisan pa man kun ako ang angayang moamin kaniya ang nakapaikag kanako sa pag-urong ang una aron bisan sa daklit kaniya ako makighimamat.
Nindot baya kuno ang makigkuyog sa usa ka tiguwang kay seguro kaayo nga daghan siyang ikatudlo kanato panahon sa atong mga kalibog. Ug tuod man, nisugod ang panaw paatras aron usisahon ang nahabiling yugto sa pakigsandurot ning kalibutan. Ang iyang kasaysayan sa dihang nipanaw siya sa gawas nasud usa man ka timaan sa pasigarbo nga bisan pa man sa iyang pangedaron nataak niya ang maong dapit. Nibiya kami binitbit ang maong mapahiyumong panagway ni Nanay samtang iyang gisud-ong ang bagang duot sa katwhan nga anaa sa iyang lagwerta aron motilaw sa pagkaong gidalit sa iyang mga anak gumikan sa pangilin nga gikahinaman sa tanan. Sa akong pagsulod sa akong lawak katulganan akong gi scroll ang News Feed sa akong FB Account. Duna diay dakong sunog nga nahitabo niadtong tuig 1967 nga maoy nakapahimo sa Carbon Public Market ingon nga literal nga Carbon gumikan sa maong sunog. Adunay Artista kaniadto nga si Julie Ann Fortich nga taga Mandaue.
Dili pud kabentahaan ang kaanyag niadtong maong binuhat sa tuig 1979 ang tuig sa akong pagkahimugso. Maanyag gyud siya ug angayan lamang nga himoong lab-as sa panumdoman sa nabag-as nga kagahapon ang maong babaye nga si Julie Ann. Salamat sa Old Memories of Cebu kay daghan kong nakat-onan.
Ug salamat usab sa Kukabildo atol sa pagduaw ni nanay kay sa maong pagduaw nakakat-on ako nga angayan lamang tahuron ug hatagan og igong gibug-aton ang matag edaran ning atong katilingban. Sil ang mga buhing legasiya sa tabunok nga kasaysayan sa nilabay nga mga dekada sa atong kinabuhi.
Ang bayhon sa maong edaran nipahinumdom kanato nga:
1. Ang kabatan-on dili molungtad. Piskay man tuod kita karon apan moabot ang panahon nga sama nila kita maluya na usab.
2. Mahimong igmat ang atong mga mata sa pagsud-ong sa mga sayop sa uban apan gumikan sa katiguwangon kita mamahimong malumo ug luya diha sa pagsud-ong sa atong palibot pamasin nga matilok nato sa katapusan ang maanindot nga mga talan-awon nga ikahatag sa mga tawo nga nagpalibot kanato.
3. Mamahimong mas luya na ang atong nilaktan ug matag kibo atong masayran ug madayeg. Dili sama niadtong batan-on pa kita nga nahimong paspas tuod ang atong nilaktan apan nahikalimot kita nga dunay mga tawo nga kuyog nato sa atong panaw.
4. Labaw sa tanan, angayan lamang nga magpaubos kita kay moabot ra gihapon ang panahon sa atong pagkalaos ug sa atong pagkalaos mamahimong subo ang palibot labina kun ang mga gihigugma nato kanhi ang dili na molingi kanato.