Kabililhon sa pagpangandam
ARANGKADA - Leo Lastimosa (Banat) - December 15, 2019 - 12:00am

Sukwahi sa lapad nga pangandam sa kagamhanan ug sa mga molupyo samtang nagsingabot ang bagyong Tisoy sayo ning buwana, way public storm warning signals nga giluwatan ang PAGASA, way niawhag nga mag-alerto ang lokal nga mga opisyal ug kapolisan ug way nagtuki angay bang suspensuhon ang mga klase sa niaging semana.

Kay way sukaranan ang kabalaka sa kahimtang sa panahon: Ang bugtong pasidaan sa PAGASA mao nga mahimong mapanganuron, uwanon ug may kilat ug dugdog sa Sugbo ug Central Visayas tungod sa init ug umog nga hangin gikan sa Pacific Ocean.

* * *

Apan ang Metro Cebu ug ubang bahin sa Sugbo ug sa rehiyon nga nakalingkawas sa kabangis ni Tisoy mas nahasol tungod sa bunok sa uwan ug kusog nga huros sa hangin nga nilungtad og pila ka takna. Igo gyod nga natanggong ang mga tinun-an ug mga trabahante nga naatlang namauli sa ilang mga pinuy-anan.

Nisamot pagkamang ang naghuot nang daan nga trapiko, may mga sakyanan gyod gani nga wa kalihok ug napugos na lang pagbalik sa agianan ug may mahinungdanon nga mga lakaw ug mga transaksiyon wa na lang idayon.

* * *

Nakaamgo na ang kadagkoan sa PAGASA sa dinaliang panginahanglan sa pag-usab sa ilang sistema sa pagpaniid sa kahimtang sa panahon. Di na sila mosentro sa naandan nga mga pasidaan sa kakusog sa hangin sa umaabot nga mga bagyo kon dili sa mamahimong mga epekto sa hulga sa panahon ngadto sa maagian nga mga dapit ug mga molupyo.

Ambot may katakos bang PAGASA sa pag-agpas unsa kakusog ang uwan nga mobubo ug unsay dangatan sa mga dapit ug mga molupyo nga maapektahan.

* * *

Usa ko sa natanggong sa trapiko tungod sa bunok sa uwan niadtong Biyernes sa hapon. Napugos ko og panghangyo nga magpapuli na lang ni Joworski Alipon sa TV Patrol Central Visayas kay wa na gyong kairog ang among sakyanan.

Maong nakahukom ko nga inay magpaabot sa mas tukma nga mga pasidaan sa PAGASA, magpalit na lang ko og kapote ug butas nga tipigan sa sakyanan. Aron nga magbaktas na lang kon simbako maabtan na sab og unos ug ma-inutil ang trapiko nga pila na lang ka dupa gikan sa among destinasyon.

leolastimosa@gmail.com

PAGPANGANDAM
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with