Pagkadako sa isyu nga dunay mga tawo nga nagpaburot sa ilang mga bulsa pinaagi sa pagpamaligya og tag P15,000 ngadto sa P20,000 sa mga puwesto diha sa Night Market sa dalan Colon.
Angay gyud kini nga dalion sa paghuman ang imbestigasyon aron nga kasilotan ang mga tawo nga nagmaniobra niining maong panguwarta gamit ang karsada sa siyudad.
Si Jonil Matugina nga maoy Cebu City market administrator mitug-an nga 518 ka vendors ang apil niining night market, ug ang ilang mga ngalan anaa sa masterlist. Nakakuha ko og kopya sa mao nga masterlist.
Mitingkag ang akong dunggan pagkadungog nga dunay mga tawo nga nanguwarta sa night market. Nakaingon ko nga angay sila nga ibulgar ug himoan og aksyon.
Apan ang pangagpas ni Matugina nga dunay mga vendors nga dili gustong maninda, ug ang ilang “rights” sa pwesto gibaligya nila ngadto sa mga gusto nga maninda.
Dako kining binuang! Dili angay’ng igo lang moingon niini si Matugina. Kon ako’y Matugina, kadtong mga pwesto nga gibaligya og laing vendors angay’ng bawion ug ihatag sa laing tindera nga dili pabayron.
Unsay tumong niini? Aron nga walay mga tawo nga mopalit og “rights” sa pwesto sa night market. Ang tinuod, dili ko supak nga adunay night market, apan dili unta diha sa Colon.
Ang pagpahigayon og night market makamugna og grabeng problema sa trapiko kay alas singko pa lang sa hapon, ang mga tindera moplastar na sa ilang mga butang daplin sa karsada.
Unta, paspasan ni Matugina ang iyang imbestigasyon ug kinahanglang may matumbok siya nga mga tawo nga maoy responsable sa binuang. Kon wala gani sila’y mabutyag, makaingon ko nga dili sila makamao nga moimbestigar.
* * *
Bilib ko ni Mayor Edgardo Labella kay atol sa Pasko ngadto na sa Bag-ong Tuig ug sa Sinulog, nahukman niya nga anhi ra gyud siya sa siyudad.
Dili siya sama sa ubang mga opisyal nga inigka Pasko, maglumba sa pagbiyahe ngadto sa laing kanasuran.
Ang rason niini mao nga aron dili sila dili makahatag og pinaskohan sa ilang mga supporters.
Sama gud ni kanhi kongresista Antonio Cuenco nga karon konsehal na sa dakbayan. Kaniadto, kada Pasko molarga gyud sa laing nasud.
Si Labella mihukom nga dili mobiyahe kay aron matutokan niya ang pagsuperbisar sa pagpatuman sa kahusay ug kalinaw dinhi sa ato.
Nindot kaayo nga hukom ug unta, manakod kini ngadto sa ubang mga opisyal sa kagamhanan.