Pahalipay

Tulo ka mga gradwado sa mga tunghaan sa Sugbo nga nagkuha og kursong Edukasyon ang nalandig sa top 10 sa gipahigayon nga Licensure Examination for Teachers (LET) sa Elementarya nga level nga gipahigayon niadtong miaging buwan sa Septiyembre niining tuiga.

Sa gipagawas nga resulta sa Professional Regulation Commission (PRC) kaniadtong Disyembre 1, 2019 nahimotang sa ikalima nga dapit (5th place) si Rebekah Louise Mendrez Rosito sa Cebu Normal University (CNU) nga may 90. 80 nga rating samtang nahimotang usab sa ikasiyam nga dapitn (9th place) si Kyn Noel Punay Pestaño sa University of San Carlos (USC) nga may 90 nga rating ingon man si Roxan Jane Pesalbon Arenas sa Cebu Technological University – San Francisco nga nahimotang sa ikanapulo nga dapit (10th place) nga adunay 89.80 nga rating.

Nahimotang sa Numero uno nga dapit (1st place) si Kezia Keren Ambag sa Philippine Nornal University – Mindanao nga adunay 92.60 nga rating.

Gitug-an sa PRC nga sa 92, 440 ka mga examinees 28, 973 lamang niini ang nakapasar.  Dako kaayo ang kalipay sa mga nakapasar ug sa ilang mga pamilya tungod kay makatabang naman sila sa pamilya ug sa pag edukar sa katawhan sa nasud. Apan uban sa maong kalipay nagpahipi usab ang mga kagulanan tungod sa mga suliran nga mihasmag ug mohasmag kanila.

Pipila sa mga suliran nga mihasmag ug posibling mohasmag mao ang kakulangan sa trabaho nga nagpaabot kanila. Dili ikalimod nga libo -libo na ang mga magtutudlo nga wala pa gayod makatrabaho isip magtutudlo maong ang uban kanila nagtindira na lamang sa mga Department stores. Walay igong pundo ang gobyerno para suhol sa dugang mga magtutudlo nga patrabahoon.

Ang mga nagtudlo na sa publikong mga tunghaan nagbagulbol pud tungod sa kakulang sa suhol nga ilang nadawat kun ikomparar sa mga nagtrabaho sa pribadong tunghaan. Gawas niini nasudlan na usab sa suliran sa gidili nga drugas ang nahisgotang propisyon. Pero sa gihapon akong ipaabot ang akong mga pahalipay sa inyong pagpasar.